Rinisja e bisedimeve me Iranin, CNN zbardh detaje të takimit “sekret” në Shtëpinë e Bardhë
Administrata Trump ka diskutuar mundësinë e dhënies së Iranit akses në 30 miliardë dollarë për të ndërtuar një program civil të energjisë bërthamore dhe për të lehtësuar sanksionet, shkruan CNN.
E gjitha kjo është pjesë e një përpjekjeje intensive për ta rikthyer Teheranin në tryezën e negociatave, konfirmuan katër burime të njohura me çështjen.
Lojtarë kyç nga Shtetet e Bashkuara dhe Lindja e Mesme kanë biseduar me iranianët prapa skenave edhe gjatë një serie sulmesh ushtarake ndaj Iranit gjatë dy javëve të fundit. Këto diskutime vazhduan këtë javë pasi u arrit një marrëveshje armëpushimi, thanë burimet.
Zyrtarët e administratës Trump theksuan se janë bërë disa propozime. Ato janë paraprake, por amerikanët nuk janë të gatshëm të negociojnë për një gjë – Irani nuk duhet të pasurojë uranium.
U zhvillua një takim sekret
Disa detaje të marrëveshjes së mundshme u përpunuan në një takim sekret, që zgjati disa orë, midis të dërguarit special të Trump, Steve Witkoff, dhe partnerëve të Gjirit Persik në Shtëpinë e Bardhë të premten e kaluar, një ditë para sulmeve ushtarake amerikane ndaj Iranit, thanë për CNN dy burime të afërta me zhvillimet.
Ndër kushtet e pazbuluara më parë që po diskutohen është një investim i vlerësuar prej 20 deri në 30 miliardë dollarësh në një program të ri bërthamor iranian pa pasurim që do të përdoret për qëllime civile të energjisë, thanë për CNN zyrtarë të administratës Trump.
Një zyrtar këmbënguli se paratë nuk do të vinin direkt nga SHBA-ja, por nga partnerët arabë. “SHBA-ja është e gatshme të zhvillojë këto bisedime me Iranin. Dhe dikush do të duhet të paguajë për ndërtimin e programit bërthamor, por ne nuk do ta marrim këtë angazhim”, vuri në dukje zyrtari.
Stimuj të tjerë përfshijnë heqjen e mundshme të disa sanksioneve ndaj Iranit dhe lejimin e Teheranit për të pasur akses në 6 miliardë dollarë që aktualisht mbahen në llogari bankare të huaja.
Një ide tjetër doli javën e kaluar dhe është aktualisht në shqyrtim. Është ideja që aleatët e Amerikës në Gjirin Persik të paguajnë për të zëvendësuar impiantin bërthamor Fordo, të cilin amerikanët e sulmuan me bomba që shkatërrojnë bunkerët gjatë fundjavës, me një program jo-pasurimi.
“Njerëz të ndryshëm po sjellin shumë ide dhe shumë prej tyre po përpiqen të jenë krijues”, raporton tutje CNN.
“Mendoj se është plotësisht e pasigurt se çfarë do të ndodhë këtu”, shtoi një burim tjetër i njohur me pesë raundet e para të bisedimeve midis SHBA-së dhe Iranit që u zhvilluan para sulmeve izraelite dhe amerikane ndaj programit bërthamor të Iranit.
Witkoff i tha dje CNBC se SHBA-të po kërkojnë një “marrëveshje gjithëpërfshirëse paqeje”.
