Dr. Ismajl Bekteshi pensionohet pas 35 vitesh shërbim: Nderohet nga Komuna e Vitisë për kontributin e veçantë
Pas 35 viteve punë të palodhshme në shërbim të shëndetit publik dhe komunitetit, dr. Ismajl Bekteshi është pensionuar, duke lënë pas një trashëgimi të çmuar profesionale dhe humane.
Me këtë rast, ai u prit nga kryetari i komunës, Sokol Haliti, i cili në emër të institucionit e falënderoi për kontributin e çmuar ndër vite dhe i ndau një mirënjohje për angazhimin e tij shembullor.
Dr. Bekteshi, përveç punës së tij në sistemin shëndetësor, ka dhënë një kontribut të veçantë edhe para luftës, si pjesë aktive e Shoqatës Humanitare “Nëna Terezë”, duke ndihmuar në kujdesin shëndetësor të qytetarëve në rrethana të vështira. Ai ka qenë për gati tri vite gjithashtu edhe profesor, duke dhënë dije dhe frymëzim brezave të rinj.
Në këtë ceremoni, ishte e pranishme edhe drejtoresha e Qendrës Kryesore të Mjekësisë Familjare në Viti, dr. Vjollca Kadolli, e cila po ashtu shprehu mirënjohje për kontributin e dr. Bekteshit në avancimin e shërbimeve shëndetësore në komunën e Vitisë.
Kryetari Haliti theksoi se figura të tilla duhet të vlerësohen dhe të mbeten model frymëzimi për gjeneratat që vijnë, ndërsa vetë dr. Bekteshi falënderoi për nderimin dhe shprehu përkushtimin e tij të vazhdueshëm për të qenë gjithmonë në shërbim të njerëzve, edhe jashtë detyrës zyrtare.
