Nxënësit e Shkollës Fillore “Fan Noli” vizitojnë Kuvendin Komunal
Në kuadër të projektit “Fuqizimi i të rinjve për transformim pozitiv shoqëror”, i cili financohet nga Komuna e Kamenicës, organizata Netëork of Peace Movement – NOPM realizoi një aktivitet të veçantë me nxënësit e klasave të pesta të Shkollës Fillore “Fan Noli” në Kamenicë.
Gjatë këtij aktiviteti, nxënësit vizituan objektin e Komunës së Kamenicës, ku patën mundësinë të mësojnë nga afër për punën e Kuvendit Komunal.
Ata u pritën nga Kryesuesi i Kuvendit, i cili i informoi për mënyrën se si funksionon asambleja komunale dhe rolin e saj në jetën e qytetarëve.
Nxënësit treguan interesim të madh, bënë shumë pyetje interesante dhe u shfaqën të entuziazmuar për të kuptuar më shumë rreth proceseve vendimmarrëse dhe rolit të institucioneve lokale.
Ky aktivitet është një hap i rëndësishëm drejt edukimit qytetar që në moshë të hershme dhe rritjes së vetëdijes për përfshirjen aktive të të rinjve në zhvillimin e komunitetit.
