Nën kërcënim të armës, i dyshuari vjedh barna dhe shiringa në një barnatore në Ulpianë
Policia e Kosovës njoftoi se një person, nën kërcënim të armës ka grabitur sot një barnatore në lagjen “Ulpiana” në kryeqytet.
Zëdhënësja e Policisë për rajonin e Prishtinës, Flora Ahmeti, tha se i dyshuari ka vjedhur një sasi të barnave të ndryshme dhe shiringa në vlerë prej 800 eurosh.
“Sot rreth orës 09:40 është raportuar për një grabitje të ndodhur në një barnatore në lagjen Ulpiana në Prishtinë. Pas marrjes së informacionit policia ka dalë në vendngjarje dhe bazuar në informacionet e para, dyshohet se një personi i dyshuar nën kërcënim të armës së ftohtë ka grabitur sasi të barnave dhe shiringave (në vlerë rreth 800 euro)”, ka thënë Ahmeti.
Policia ka iniciuar një hetim lidhur me rastin dhe ka nisur ndërmarrjen e veprimeve të nevojshme për zbardhjen e rrethanave të rastit si dhe identifikimin dhe arrestimin e personit të dyshuar.
