Vijon “Vjeshta Letrare e Gjilanit 2023”, me “Shprushje nëpër vargje që nuk zbehen”
Gjilan: Në vigjilie të festave të nëntorit, përurohet libri me shkrime kritike për poezinë e Rexhep Elmazi
Veprimtaria e radhës e edicionit të 14-të të Manifestimit “Vjeshta letrare e Gjilanit”, që do të mbahet më 25 nëntor, ora 12:00, në Bibliotekën e Qytetit në Gjilan, dhe do t’i kushtohet Rexhep Elmazit, përkatësisht librit të botuar me shkrime kritike për poezinë e këtij poeti, “Shprushje letrare nëpër vargje që nuk zbehen”.
Janë përzgjedhur një grup autorësh që në këto pesë dekada kanë shkruar dhe vlerësuar poezinë e këtij atdhetari e poeti tejet premtues, por që jeta e me të edhe krijimtaria iu ndërpre dhunshëm…
Nga viti 1973 e deri në këtë vit kur shënuam 45 vjetorin e vrasjes së tij tinxare nga eksponentë të regjimit të asaj kohe, në çdo etapë kohore, prej penave të shquara të letërsisë sonë, poezia e Rexhep Elmazit asnjëherë nuk është lënë në harresë.
Botimin e këtij libri, përmes Thirrjes publike “Mbështetja e Autorit” për vitin 2023, e ka mbështetur Ministria për Kulturë, Rini e Sport e Republikës së Kosovës, shkruan faqja zyrtare e ARS Club “Beqir Musliu” – Gjilan.
