Silvana Begaj – Stokholm: ‘kryeministri është bindur se qeverisja e tij është kthyer në sulltanat’
Asgjë që bënë keq nuk e cënon! Ka parimin: Varfëroje një popull deri në atë pikë sa nuk do të ketë motivim apo mundësi të ngrihet në mëngjes e jo më të ketë forcë të kundërshtoj veprimet e një udhëheqësi.
Shkruan: Silvana BEGAJ
Me romuzet që e karakterizojnë duket sikur arrinë të mbulojë çdo vjedhje, korrupsion e krim që ndodh duke dalë i pafajshëm. Në cdo vend të botës një kryeministër jep dorëheqjen edhe nëse kalon padashje semaforin me të kuq në rrugë, por kryeministri jonë trim as nuk lëkundet nga karrigia, as kur i akuzohet ministri i brendshëm për trafik ndërkombëtar droge dhe as kur i arratiset zv. kryeministri për një skandal që do rrëzonte mbretëri e sulltanate.
Ne si shoqëri dimë se çfarë hëngri për drekë komshia i katit të parë, cfarë i tha në konfidencë komshia e katit të dytë komshies tjetër etj., dhe kryeministri jonë nuk e di kush i ka kullat më të larta në Tiranë, as si po vidhen fondet europiane për bujqësinë etj.
E ngaqë e di që lajthitjet e tij zemërojnë vetëm njerëz në fb e në kafenetë e qyteteve, ashtu në mes të gushtit kryeministri kërkon konsultim publik për të shtuar një taksë me detyrim për tërmetin. z. kryeministër unë, e shumë shqiptarë e dimë se si shkojnë konsultimet tuaja publike, prandaj e di me siguri se ju do ta miratoni. Ashtu në terr si çdo gjë tjetër që ka të bëjë me paranë.
Por nuk na the që dhe ne të dimë: Si do funksionojë kjo taksë? – Cfarë skeme do të përdoret? – Kush e garanton që ato s’do përdoren për mbulimin e ndonjë vjedhje tjetër? – Si mund ta dimë se nëse pas 50 vjetësh bie tërmet nuk do dëgjojmë skandalin e radhës, që thjeshtë janë vjedhur? – Unë e di mirë se vapa të jep dhe halucinacione, po pse s’pate një ide për mirë xhanëm? – Pse mendove me gjenialitet për tërmetin, i cili statistikisht që të ketë pasoja, do dekada te ndodhi, por nuk mendon për ndonjë taksë modeste apo siguracion për ndonjë fenomen që ndodhë më shpesh në vendin tonë? – Pse nuk siguron të mbjellat e bujqëve, që ose përmbyten nga shirat ose thahen nga mungesa e ujit.
Ka aq shumë çështje për të bërë konsultime publike sa vetëm një mendje hajdute e pangopur do mendonte shtimin e taksave e mbi të gjitha me detyrim. – Sa taksa paguhen aty pa marrë shërbim?
Edhe sulltanatet bien, e mbretëritë shkatërrohen e mbi të gjitha kur njerëzit më të afërt iu kërcënojnë nga kush e di se ku. Boll e shtypët këtë popull çdo ditë, e boll shpikët ndonjë zhvatje të re nga xhepat e tyre sa herë që iu kapë ndonjë delir.
Konsultimet publike propozoj t’i bëjmë publikisht në media dhe jo me “fletërrufe” e as në cepa lagjesh me tekst të orkestruar. Unë do të vi me kënaqësi t’iu jap përgjigje të bazuara se është koha që të filloni të mendoni të ndihmoni bizneset e ndershme, familjet në nevojë, e jo ti varfëroni.
Ju uroj pushime të qeta pa “ethe” gushti se s’i dihet ç’mendoni përsëri buzë detit.
