Diskriminimi etnik ka emër!
Fshati Samolicë në komunën e Bujanocit ka rreth 1900 banorë, të gjithë shqiptarë. Në shkollën e këtij fshati janë të gjithë nxënësit shqiptarë.
Rruga përreth shkollës lidhë Bujanocin me Preshevën, magjistrale kjo që lidhë edhe disa fshatra me shqiptarë.
Pavarësisht kësaj, në pjesën e rrugës ku njoftohet se është “Zona e shkollës” mbishkrimi është bërë vetëm në gjuhën serbe, madje në alfabetin çirilik, çka është e pa logjikshme dhe e pa pranueshme.
Lidhur me këtë çështje, ka reaguar Kryetari i Këshillit Kombëtar Shqiptar me seli në Bujanoc, Nevzad Lutfiu, i cili thotë se përveç që nuk ka kuptim e as logjikë, është në kundërshtim me respektimin e të drejtës së dygjuhësisë.
“Sot i dërgova shkresë drejtorisë së kompanisë përgjegjëse nga të cilët kërkova që të respektohet dygjuhësia”, ka shkruar Lutfiu.
“I ftoj bashkëqytetarët për bashkëpunim, kudo që shihni raste të tilla të na njoftoni”, ka përfunduar ai, i vendosur në mbrojtje të të drejtave të nëpërkëmbura të shqiptarëve të kësaj treve të “dhëmbjes krenare”, të vazhdimësisë së trungut etnik.
