Lexuesi i Deklaratës së 2 Korrikut: Akti ynë, vullnet i qytetarëve

Delegati dhe lexuesi i shpalljes së Deklaratës Kushtetuese të 2 Korrikut të vitit 1999, Muharrem Shabani, ka thënë se akti i delegatëve të legjislaturës së Kuvendit të Kosovës në atë periudhë ishte shprehje e vullnetit të qytetarëve.

Nga: B. Halimi | RTKlive

33 vjet nga shpallja e asaj deklarate, Muharrem Shabani foli në Lajmet e RTK-së për rëndësinë e asaj dite.

“Shikuar nga kjo distancë për shumë gjenerata ndoshta shikohet më ndryshe, por jo edhe për gjeneratat e vjetra të cilat e kanë përjetuar situatën në të cilën është nxjerrë kjo deklaratë, ku populli ka qenë po thuajse në shtetrrethim policor e institucionet para supremimit nga politika hegjemoniste serbe. Deklarata u nxor në kushte të jashtëzakonshme. Ajo shprehte vullnetin e popullit. Ishte një koordinim i punës me Akademinë e Shkencave, me njerëz të institucioneve dhe Komisionit Kushtetues të Kuvendit të Kosovës, që përbëhej me ekspertë me renome të asaj kohe. Si e tillë, i parapriu edhe akteve tjera që u nxorën më vonë”, tha Shabani.

Ai theksoi se shpallja e Deklaratës së 2 Korrikut shprehte atë vullnet që ishte akumuluar në shpirtin dhe zemrën e qytetarëve me dekada – që të hiqej nga sundimi serb.

“Ata filluan në të gjitha format e mundshme që të mos i lejohej më hapësirë Kosovës që ajo të qeverisë me institucionet e vet dhe me pasuritë e veta. Ne, si legjislaturë e morëm situatën në gjendje shumë të rëndë. Në mars të vitit 1989 ishin aprovuar ato amandamente me të cilat suprimohej autonomia e Kosovës”, shtoi delegati i Kuvendit i asaj periudhe.  

Ai tutje tha se pritjet kanë qenë të mëdha me rastin e shpalljes së deklaratës, pasi ajo verbalisht juridikisht e politikisht e shprehte vullnetin e qytetarëve, teksa kishin filluar disa lëvizje edhe në Evropën Lindore e po ashtu edhe brenda Jugosllavisë kishin mbështetje nga republikat properëndimore si Sllovenia e Kroacia.

“Në ditën që e kam lexuar deklaratën kam marrë diku urime e përkrahje prej 9 senatorëve e kongresmenëve. që vërtet ishte një shenjë sepse në atë kohë Kosova nuk ishte askund në agjendë. Ishte një pritje e madhe se do të përmirësoheshin kushtet dhe jeta. Ne nuk kemi pasur tendencë që me aktet tona t’i shkelim të drejtat e të tjerëve, sepse vetë i kishim të drejtat të shkelura. Prandaj, ne edhe në Kushtetutën e Kaçanikut i morëm të gjitha ato tipare të Kushtetutave më demokratike në Evropë”, nënvizoi Shabani.

Në fund ai ka komentuar edhe faktin që 33 vjetori i shpalljes së Deklaratës Kushtetuese nuk u shënua me asnjë aktivitet institucional.

“Për fat të keq. Ndoshta ditë e diel, ndoshta angazhimi në çështje tjera, por e njëjta situatë ka qenë edhe vjet. Parvjet ka qenë një ftesë dhe është vendos një pllakë në Kuvend. Derisa ka qenë presidenti Rugova ka pasur aktivitet çdo vit. Ishte një satisfaksion edhe për delegatët, të cilët tash janë plakur, e 45 prej tyre kanë ndërruar jetë. Një pjesë janë me pengesa fizike, me paterica e me forma tjera. Ata kanë nevojë edhe për mjekime, edhe për ndonjë kujdes social e shëndetësor, e që u mungon”, theksoi tutje Shabani.

Ai ka bërë të ditur se që nga koha kur në krye të Kuvendit ishte Kadri Veseli delegatët e kësaj legjislature kanë marrë si  përkrahje nga 220 euro në muaj.

Burimi i lajmit: RTKlive