Vizita e Vulin në Moskë, reagojnë Ambasadat e SHBA-së dhe Ukrainës në Serbi
REL
Ambasadat e Ukrainës dhe të Shteteve të Bashkuara të Amerikës (SHBA) në Beograd kritikuan me deklarata të veçanta, pjesëmarrjen e drejtorit të Agjencisë për Siguri dhe Informacion (BIA) të Serbisë, Aleksandër Vulin, në konferencën ndërkombëtare të sigurisë në Moskë.
Në përgjigjen e saj për Radion Evropa e Lirë (seksioni në gjuhën serbe), Ambasada e Ukrainës theksoi se Serbia dhe Ukraina po përpiqen për anëtarësim në Bashkimin Evropian (BE) dhe se Serbia, në lidhje me këtë, duhet të vendosë sanksione ndaj Rusisë.
“Ne llogarisim në faktin se vendi kandidat për anëtarësim në BE do t’i bashkohet politikës së përbashkët evropiane ndaj shtetit agresor, Federatës Ruse”, tha Ambasada e Ukrainës.
Ambasadori amerikan në Serbi, Christopher Hill, në një deklaratë me shkrim për Radion Evropa e Lirë ka thënë se “askush nuk duhet t’i japë legjitimitet veprimit rus duke bashkëpunuar me Kremlinin sikur gjithçka është në rregull”.
“Agresioni i Rusisë kundër fqinjit të saj paqësor, Ukrainës, është i paligjshëm dhe i paarsyeshëm. Vladimir Putin filloi këtë luftë brutale. Ai mund dhe duhet ta përfundojë atë menjëherë dhe të ndalojë vdekjen dhe shkatërrimin që po shkakton lufta e tij,” tha Hill.
Media shtetërore ruse raportoi më 24 maj se drejtori i BIA-s, Aleksandar Vulin, po merr pjesë si përfaqësues i Serbisë në konferencën ndërkombëtare të sigurisë në Moskë.
Vizitën e Vulin në Moskë e ka komentuar edhe senatori amerikan Chris Murphy, i cili po viziton Beogradin, ku ka takuar presidentin e Serbisë, Aleksandar Vuçiq.
Në një konferencë për shtyp më 25 maj, Murphy tha se “Rusia po kërkon miq këto ditë” dhe se do të ishte mirë për qytetarët serbë nëse Serbia do t’i respektonte sanksionet kundër Rusisë dhe të ishte me Bashkimin Evropian për këtë çështje.
“Unë nuk mendoj se është konstruktive për ndonjë komb që të ofrojë mbështetje politike dhe morale për regjimin e (Presidentit rus) Vladimir Putin,” tha Murphy.
Informacioni zyrtar për pjesëmarrjen e Vulin në konferencën në Moskë nuk u publikua në faqet e internetit të institucioneve zyrtare në Serbi dhe Qeveria e Serbisë nuk iu përgjigj pyetjes nga Radio Evropa e Lirë për këtë.
Në fotot e publikuara nga Russia Today Balkan si pjesë e lajmeve të 24 majit, Vulin shihet me pjesëmarrës të tjerë të konferencës, përfshirë anëtarin e presidencës së Bosnje-Hercegovinës nga entiteti i Republika Sërpska, Milorad Dodik.
Darko Obradoviq nga Qendra joqeveritare për Analiza Strategjike me qendër në Beograd i tha Radios Evropa e Lirë se pjesëmarrja e Vulin në ngjarjen në Rusi dërgon një imazh negativ në botë.
Një fotografi e tillë, siç tha ai, është dërguar edhe tek partnerët e Serbisë, të cilët janë investitorët më të mëdhenj, e njëkohësisht edhe partnerët më të mëdhenj tregtarë sot, duke iu referuar vendeve të Perëndimit.
“Mendoj se është kundërproduktive që dikush nga Serbia të marrë pjesë në konferencat parandërkombëtare të Moskës”, tha Obradoviq.
Ai theksoi se lëvizjet politike të jashtme të zyrtarëve “duhet të jenë në përputhje me interesat strategjike të Serbisë”.
(Marrë me shkurtime nga REL. Titulli në origjinal: Ambasadat e Ukrainës dhe të SHBA-së dënuan pjesëmarrjen e Vulin në konferencën në Moskë)
