Gjilan: u varros me nderime mësuesi veteran, Fehmi Sejdiu
Në varrezat e Qytetit në Gjilan u varros me nderime mësuesi Fehmi Sejdiu nga Breznica e Komunës së Bujanocit.
Mësuesit dikur, gjatë viteve 90-të e më parë, shquheshin si personaliteti më të veçanta e më të rëndësishme intelektuale nëpër ambienteve rurale fshatare e mjedise urbane, dhe si të tillë, ishin personalitete të shquara që bartnin më vete autoritetin e pakontestueshëm moral të shoqërisë.
I tillë ishte mësuesi Fehmi Sejdiu nga Breznica e Bujanocit, i cili ndërroi jetë të dielën më 26 shkurt e u varros të hënën më 27 shkurt 2023.
Në prani të një numri të madh bashkëvendësish, kolegësh e qytetarësh nga Gjilani dhe Malësia e Bujanocit, në Varrezat e Qytetit në Gjilan u varros pedagogu e pishtari i arsimit Fehmi Sejdiu nga Breznica e Komunës së Bujanocit, të cilit me nderime iu dha lamtumira e fundit nga pjesëmarrës të shumtë në kortezhin funeral.
Në emër të shkollës Fillore “Migjeni” në Muhoc, paralelja e ndarë në Breznicë ku punoi e veproi ai, foli drejtori i kësaj vatre të arsimit, Sadik Demiri, i cili i bëri një kronologji jetës dhe veprimtarisë së mësuesit Fehmi Sejdiu, si dhe kontributit të tij në edukimin e nxënësve të shumë brezave.
“… Në shtator të vitit 1983 Fehmi Sejdiu punësohet në shkollën Fillore “Migjeni” në Muhoc, paralelja e ndarë në Breznicë, të cilit mision të shenjtë në arsimimin dhe edukimin e brezave të rinjë iu përkushtua për plotë 39 vjetë, pa iu nda deri në fund të jetës së tij. Për punën e tij të palodhshme, më së miri tregojnë nxënësit e tij, si dhe shpërblimet e mirënjohjet nga drejtoria e Shkollës…”, tha mes tjerash drejtori Demiri.
Arsimtari Fehmi Sejdiu përveç si mësues dhe edukator i brezave të shumtë, njihet edhe si aktivist i devotshëm, si dhe mbështetës i përhershëm moral i të gjitha nismave të avancuara që e kanë karakterizuar vendlindjen e tij Breznicën, trevën e Malësisë së Bujanocit të njohur si “Hashania”, si dhe mbarë rajonin e Anamoravës, përfshirë aktivitetet sportive e kluturore të viteve 90-të e shumë më shumë.
