Argjentina fut në telashe “Adidasin”, s’ka më fanella në shitje
Mesazhi është i njëjtë kudo, në ç’do faqe interneti të “Adidas” nëse kërkon fanellën e Argjentinës mesazhi është i njëjtë…. sold out, agotado, venduto. Në çdo cep të globit nuk ka fanella të Argjentinës në shitje. Aq shumë janë shitur sa kanë mbaruar dhe fanellat e dyta dhe ato specialet të bëra vetëm për fitoren në Lusail!
Një zëdhënës i Adidas tha sot për Bloomberg se: “Falë rritjes të papritur të kërkesës për fanellat e Argjentinës po shikojmë në të gjithë globin se rrezervat që kishim në disa pika po mbarojnë. Jemi në punë intensive që tu japim mundësi tifozëve që të festojnë këtë triumf të madh dhe duam që të hedhim sa më shumë fanella të reja në treg sa më shpejt të jetë e mundur”. Edhe Federata Argjentinase e Futbollit ka analizuar mungesën e fanellave në treg. “Edhe pse është në interesin tonë që të shiten sa më shumë fanella ne nuk kemi asgjë në dorë dhe po presim që sponsori teknik të bëjë diçka në këtë drejtim edhe pse janë disa faktorë që po e pengojnë Adidas të plotësojë kërkesën e lartë të tregut. Sanksionet ekonomike, mungesa e punëtorëve si dhe niveli i lartë i kërkesës të fnallës kanë bërë që Adidas të jetë në vështirësi”, pohoi sot një përfaqësues i AFA-s.
Në këtë histori një pjesë e mirë e “përgjegjësisë” i shkon edhe zinxhirit të furnizimit, trazirave politike në Botë, mungesës së lëndëve të para dhe rritjes së kostos të karburantit dhe energjisë si dhe inflacionit. Tifozët e Argjentinës në Amerikën Latine ishin me fat pasi Adidas shiti për disa ditë fanellat me tre yje. Sa i përket tifozëve argjentinas në Europë mësohet se fanellat e reja do të dalin në shitje jo më herët se 13 prilli i 2023.
