Elhami Shabani, sportisti më i mirë i Gjilanit për vitin 2022
Gjilan – Karateisti i Klubit “Drita”, Elhami Shabani, është shpallur sportisti më i mirë i vitit 2022, ndërsa çmimin ia ndau kryetari i komunës Alban Hyseni.
Në një konkurrencë mjaft interesante me numër të konsiderueshëm talentësh që kanë dëshmuar suksese të jashtëzakonshme në sporte të ndryshme, Elhami Shabani ka marrë më së shumti vlerësime, duke u bazuar në rezultatet kulmore të dëshmuara, për t’u shpallur sportisti më i mirë gjilanas i vitit që po e lëmë pas.
Në arsyetimin e jurisë vlerësuese është thënë se “Karateistit Elhami Shabani i jepet ky çmim me motivacion për sukseset e arritura në garat vendore dhe ato ndërkombëtare”.
Ai është fitues i Medaljes së Bronztë në Kampionatin Evropian të Karatesë, Kampion i Kosovës në Karate dhe fitues i shumë turneve të ndryshme në vend, rajon dhe botë.
Çmimin e sportistit më të mirë të Gjilanit për vitin 2022 atij ia ka dhënë kryetari i Komunës së Gjilanit, Alban Hyseni.
