Reagime pozitive pas vendimit për vizat

Shumë reagime në rrjetet sociale kanë bërë zyrtarë të ndryshëm evropianë, por edhe gazetarë dhe personalitete të tjera, pas lajmit që ambasadorët e BE-së, u pajtuan për t’i dhënë mandatin Këshillit Evropian, që të negociojë procesin e heqjes së vizave për Kosovën me Parlamentin Evropian.

Nga: Jeton Musliu/RTKlive

Zëdhënësja e presidencës çeke, Eva Hrncirova ka shkruar se shpreson që procesi të vazhdojë.

 “Më në fund një lajm i mirë për Kosovën! Shpresoj që të vazhdojë pa probleme”, shkroi ajo.

Jack Parrock, korrespodent nga BE-ja për Euronews, sjkroi se liberalizimi I vizave ndoshta do të bëhet në janar të 2024-ës.

“Vendet e BE-së kanë dhënë miratimin e tyre për fillimin e negociatave për liberalizimin e vizave për Kosovën”, shkroi ai.

“Ambasadorët dhanë pëlqimin këtë mëngjes me diskutimet që do të nisin seriozisht përpara vitit të ri”.

Vendimin e ambasadorëve të vendeve anëtare të Bashkimit Evropian për t’i hapur rrugë liberalizimit të vizave për Kosovën, e ka mirëpritur edhe ambasadori i Gjermanisë në Kosovë, Jorn Rohde.

Diplomati gjerman në një shkrim më Twitter ku edhe publikon flamurin e Kosovës me shenjën e BE-së, lajmin e  konsideron të vonuar, por edhe të shumëpritur.

Edhe Thomas Waitz deputet në Parlamentin Evropian, e ka quajtur lajm të mirë vendimin për negocimin e procesit për heqjen e vizave për Kosovën.

Vendimin e ambasadorëve të BE-së për vizat, e ka mirëpritur edhe gazetari për çështje evropiane dhe të NATO-s, Stephan Israel.

“Faleminderit presidencës çeke. Pas kësaj Spanja dhe Suedia do ta marrin përsipër, me pak interesim për avancimin e dosjes”, ka shkruar Israel.

Liberalizimi i vizave për Kosovën do të hyjë në fuqi jo më vonë se më 1 janar të vitit 2024.