Zyrtari Administrativ në konvikt shqetëson studentet banuese, reagon Parlamenti Studentor i Universitetit të Prishtinës
Parlamenti Studentor i Universitetit të Prishtinës me shqetësim të madh ka pranuar lajmin për keqpërdorimin e detyrës zyrtare të një zyrtari administrativ në Qendrën e Studentëve, i cili ka cenuar sigurinë e studenteve vajza, banuese në konviktin numër 5.
Ky i fundit, në orët e vona të natës, ka shqetësuar studentet vajza përmes vizitave të paarsyeshme dhe potencialisht tendencioze, thuhet në njoftim e publikuar në faqen e këtij institucioni studentor.
“Ne ndihemi jashtëzakonisht të indinjuar, pasi që një rast i tillë përveçse i pahijshëm është edhe i rrezikshëm dhe paraqet një vazhdimësi të asaj që nuk është një problem lokal por nacional. Situatat e tilla kaotike krijojnë pasiguri shoqërore, prandaj janë absolutisht të papranueshme. Ne dënojmë fuqishëm këtë akt dhe sot gjatë ditës kemi dërguar kërkesë për pezullimin e këtij zyrtari nga vendi i punës dhe zotohemi që do të kërkojmë përgjegjësi deri në fund, do të punojmë maksimalisht për rritjen e sigurisë dhe mirëqenies te të gjithë studentët e Universitetit të Prishtinës, e pse jo edhe më gjerë”, thuhet në reagim.
Parlamenti Studentor është i studentëve dhe për studentët, vijohet me tej, duke inkurajuar studentet në shenjë solidarizimi.
“Problemet tuaja janë edhe problemet tona. Ne inkurajojmë secilin prej jush që të denoncoj çfarëdo padrejtësie apo situate të pakëndshme me të cilën mund të përballeni, në mënyrë që së bashku të gjejmë zgjidhjen më të mirë të mundshme”, thuhet në reagim.
