Vazhdimi i seancës konstituive caktohet për nesër në ora 12:00
Vazhdimi i seancës konstituive të Kuvendit të Kosovës është caktuar të mbahet nesër (e enjte) në orën 12:00.
Kjo është bërë e ditur në një njoftim nga Kuvendi i Kosovës, shkruan gazeta online Reporteri.net.
Një ditë më parë, Kuvendi dështoi t’i verifikonte mandatet e deputetëve të dalë nga zgjedhjet e 9 shkurtit. Opozita e deritashme tha se votoi kundër me pretekstin se kryeministri dhe ministrat, duan të marrin post të deputetit “ende pa dhënë dorëheqje”.
E zyrtarët qeveritarë kanë thënë se pas përfundimit të mandatit, para certifikimit si deputetë, llogaritet të jenë efektivisht të dorëhequr. Kësisoj, edhe kryeministri në detyrë Albin Kurti ka thënë se e ka dërguar një letër të konfirmimit të dorëheqjes te kryetari i deritashëm i Kuvendit.
Pas dështimit të verifikimit të mandateve, seanca u ndërpre.
Pas ndërprerjes së seancës, kryesuesi Avni Dehari iu drejtuar me një letër presidentes Vjosa Osmani, për hapat e mëtejmë.
Presidentja Vjosa Osmani i ka kthyer sot përgjigje Kryesuesit të seancës, Avni Deharit, lidhur me shkresën që i ka dërguar sot për dështimin e seancës konstituive dje.
Osmani u kërkoi deputetëve që Kuvendi të mblidhet nesër.
“Rrjedhimisht, gjithashtu ju rikujtoj se fryma e Kushtetutës, praktika gjyqësore e Gjykatës Kushtetuese dhe Rregullorja e Kuvendit të Kosovës, ju obligon që seancën konstituive ta vazhdoni jo më vonë se brenda dyzet e tetë (48) orëve nga ndërprerja e saj. Andaj, ju ftoj që në përputhje me autorizimet tuaja si Kryesues i seancës konstituive të Legjislaturës së Nëntë të Kuvendit, efektive që nga data 8 prill 2025, ta realizoni seancën konstituive në përputhje me parimet kushtetuese të përmendura më lart, Rregulloren e Kuvendit si dhe legjislacionin në fuqi.”, thuhet në letër.
