Universiteti Publik “Kadri Zeka” nënshkruan dy marrëveshje bashkëpunimi me Universitetin Çag të Turqisë
Universiteti Publik “Kadri Zeka” në Gjilan ka zgjeruar bashkëpunimin e tij ndërkombëtar përmes nënshkrimit të dy marrëveshjeve të rëndësishme me Çag University nga Mersin, Turqi.
Marrëveshjet përfshijnë Memorandumin e Mirëkuptimit për bashkëpunim institucional dhe Marrëveshjen Interinstitucionale në kuadër të programit ICM – International Credit Mobility, e cila mundëson shkëmbimin e stafit dhe studentëve ndërmjet dy universiteteve.
Memorandumi i Mirëkuptimit është nënshkruar nga Rektori i Universitetit Publik “Kadri Zeka”, Prof. Asoc. Dr. Artan Dërmaku dhe nga Zëvendës Rektori i Universitetit Çag, Prof. Dr. H. Mahir Fisunoglu, me qëllim të krijimit dhe zhvillimit të marrëdhënieve institucionale ndërmjet dy universiteteve.
Në kuadër të këtij bashkëpunimi, të dy institucionet do të angazhohen në shkëmbimin e stafit akademik dhe administrativ, mobilitetin e studentëve në nivel bachelor dhe master, si dhe në realizimin e aktiviteteve të përbashkëta kërkimore, botuese dhe mësimdhënëse. Bashkëpunimi do të përfshijë gjithashtu organizimin e konferencave, seminareve, punëtorive dhe aktiviteteve të tjera shkencore e profesionale që kontribuojnë në avancimin e cilësisë akademike dhe forcimin e lidhjeve ndërkombëtare.
Ndërsa Marrëveshja Interinstitucionale në kuadër të ICM do të krijojë mundësi konkrete për mobilitet të studentëve dhe stafit nga të dy universitetet, duke mundësuar shkëmbim të përvojave akademike, kulturore dhe profesionale në një mjedis ndërkombëtar.
Kjo marrëveshje paraqet një hap të rëndësishëm në strategjinë e ndërkombëtarizimit të Universitetit Publik “Kadri Zeka”, duke zgjeruar rrjetin e partneriteteve ndërkombëtare dhe duke krijuar mundësi të reja për studentët dhe stafin akademik në nivel evropian dhe ndërkombëtar
