UKZ dhe UP diskutojnë zgjerimin e bashkëpunimit akademik në fushën e historisë
Përfaqësues të Fakultetit të Shkencave Sociale në Universitetin Publik “Kadri Zeka” në Gjilan kanë zhvilluar një takim pune me drejtuesit e Departamentit të Historisë në Universitetin e Prishtinës, me fokus forcimin e bashkëpunimit akademik dhe shkencor ndërmjet dy institucioneve.
Në takim morën pjesë dekani i Fakultetit të Shkencave Sociale të UKZ-së, Prof. Asoc. Dr. Selim Daku, dhe prodekani Prof. Ass. Dr. Blerim Haziri, të cilët u pritën nga shefi i Departamentit të Historisë në UP, Prof. Ass. Dr. Mentor Hasani, si dhe Prof. Kujtime Boshtrakaj-Camaj.
Gjatë diskutimeve u trajtuan çështje që lidhen me përvojat akademike, procesin e mësimdhënies, organizimin institucional dhe mundësitë për bashkëpunim të mëtejmë ndëruniversitar. Pjesë e bisedës ishin edhe praktikat më të mira për avancimin e cilësisë në arsimin e lartë dhe fuqizimin e bashkëpunimit akademik e shkencor.
Përfaqësuesit e Departamentit të Historisë theksuan rëndësinë e shkëmbimit të përvojave dhe ideve në funksion të zhvillimit institucional dhe akademik.
Nga të dy institucionet u shpreh gatishmëri për thellimin e bashkëpunimit në fusha të ndryshme, duke përfshirë shkëmbimet akademike për studentët, veçanërisht në nivelin master, organizimin e aktiviteteve të përbashkëta dhe krijimin e mundësive të reja për projekte të përbashkëta në të ardhmen.
Bashkëbiseduesit vlerësuan se takime të tilla janë të rëndësishme për ndërtimin e partneriteteve të qëndrueshme dhe avancimin e bashkëpunimit në interes të studentëve dhe stafit akademik.
