Ukë Rugova dhe të tjerët lirohen nga akuza për keqpërdorim me viza
Gjykata Themelore në Prishtinë ka marrë vendim që t’i lirojë nga akuza për keqpërdorim me viza italiane ish deputetin, Ukë Rugova, ish-ministrin e Ministrisë së Kulturës, Rinisë dhe Sportit, Astrit Haraqija, Florjan Petani, Qefser Baholli dhe Izet Beqiri.
Lajmin e ka konfirmuar për media avokati Besnik Berisha.
Ndryshe, ky rast gjykohej nga misioni i EULEX-it, por pas përfundimit të mandatit, lënda ishte transferuar të vendorët. Kjo lëndë, më pas ishte caktuar te gjykatësja Naime Krasniqi-Jashanica, e cila nuk kishte caktuar asnjë seancë në vitin 2018.
Lexo edhe:
Përpjekja e parë për mbajtje të seancës ishte bërë pas një viti, përkatësisht në janar të vitit 2019, mirëpo kjo seancë kishte dështuar në mungesë të katër të akuzuarve.
Në seancën fillestare të mbajtur më 30 gusht të vitit 2016, Ukë Rugova dhe të tjerët ishin deklaruar të pafajshëm për akuzat me të cilat ngarkoheshin. Të pafajshëm ishin deklaruar edhe në seancën e mbajtur më 11 janar të vitit 2017.
Aktakuza e Prokurorisë Speciale të Republikës së Kosovës (PSRK), e ngritur më 16 maj të vitit 2016, e ngarkonte Ukë Rugovën se gjatë periudhës maj 2011 deri në shkurt 2014, ka menaxhuar një grup kriminal duke furnizuar individë me viza shengen të BE-së, nga Ambasada Italiane në Prishtinë.
Të gjitha këto viza supozohej se janë marrë në mënyrë të paligjshme nëpërmjet shtrembërimit apo korrupsionit.
