UEFA reagon pas fitores së Kosovës ndaj Suedisë
Kosova ka shënuar një fitore historike në Goteborg ndaj Suedisë, duke triumfuar me rezultat minimal 1-0 në ndeshjen e vlefshme për raundin e katërt të kualifikimeve për Kupën e Botës 2026.
Kjo ndeshje u zhvillua përpara një atmosfere të zjarrtë, ku djemtë e Franco Fodës treguan karakter, disiplinë dhe një organizim perfekt në fushë.
Golin e vetëm të takimit e realizoi Fisnik Asllani, i cili po kalon një formë të jashtëzakonshme edhe me klubin e tij. Sulmuesi 22-vjeçar shfrytëzoi një pasim në zonë dhe me një goditje të saktë mposhti portierin suedez, duke i dhënë Kosovës tre pikë me peshë të artë.
Ndryshojnë statistikat: Kosova tani ka 75 për qind shanse për ta siguruar play-offin e Botërorit telegrafi.com
Kjo është fitorja e dytë radhazi për Dardanët, të cilët tashmë kanë 7 pikë pas katër ndeshjeve, duke u ngjitur në vendin e dytë të grupit, vetëm tri pikë prapa Zvicrës kryesuese.
Pas ndeshjes, UEFA e ka cilësuar këtë si një “fitore të madhe për Kosovën në Goteborg”, duke vlerësuar progresin e dukshëm të ekipit që po fiton gjithnjë e më shumë respekt në arenën ndërkombëtare.
Një tjetër detaj mbresëlënës është fakti që Kosova nuk ka pranuar asnjë gol në tri ndeshjet e fundit, një tregues i qartë i soliditetit mbrojtës dhe punës së madhe që po bën trajneri Foda me skuadrën.
