U regjistruan temperatura deri në 42°C – korriku i këtij viti, muaji më i nxehtë ndonjëherë në Kosovë
Instituti Hidrometeorologjik i Kosovës ka njoftuar se në muajin korrik është regjistruar temperature rekorde, mbi 40 gradë Celsius, duke tejkaluar kështu rekordet historike të regjistruara ndonjëherë.
Sipas Insitutitit, vlerat maksimale prej 42.4°C në Klinë dhe 42.3°C në Han të Elezit janë të pashembullta në historinë klimatike të vendit dhe tregojnë një devijim të madh nga mesatarja shumëvjeçare për këtë muaj.
“Rritja e temperaturave ekstreme është një nga pasojat më të drejtpërdrejta të ngrohjes globale. Modelet klimatike dhe raportet ndërkombëtare (p.sh., IPCC) parashikojnë se Evropa Juglindore, përfshirë Ballkanin, do të përballet me më shumë valë të të nxehtit, thatësira të gjata dhe reshje të rralla por intensive. Korriku 2025 përkon me këtë tendencë, duke reflektuar një klimë gjithnjë e më të paqëndrueshme dhe të ngarkuar me energji termike”, thuhet në njoftim.
Temperatura më e lartë e mëparshme në Kosovë ishte ajo e regjistruar në Prizren në vitin 1987 me 40.8°C.
“Kalimi i kësaj vlere pas 38 vitesh tregon një trend rritës të ngrohtësisë, jo si fenomen i izoluar por si pjesë e një procesi afatgjatë të transformimit klimatik”, thuhet në njoftim.
IHMK ka renditur edhe pasojat dhe rëndësinë:
– Shëndetësore: Rritje e sëmundjeve të lidhura me të nxehtin (goditje termike, probleme kardiovaskulare).
– Ekologjike: Stres për bimësinë, kafshët dhe ekosistemet ujore.
– Ekonomike: Dëme në bujqësi, rritje e konsumit të energjisë për ftohje dhe rrezik për infrastrukturën.
“Ngjarjet klimatike të korrikut 2025 përbëjnë një sinjal të qartë për domosdoshmërinë e veprimit të menjëhershëm dhe të koordinuar për përshtatje ndaj ndryshimeve klimatike. Institucionet përgjegjëse duhet të fuqizojnë monitorimin meteorologjik, planifikimin urban, sistemet e paralajmërimit të hershëm dhe politikat mjedisore për të minimizuar rreziqet në të ardhmen. Në këtë kontekst, korriku 2025 nuk është thjesht një muaj i nxehtë, por një konfirmim i paralajmërimeve shkencorore për përshpejtimin e ndryshimeve klimatike”, përfundon njoftimi.
