U promovua monografia dhe albumi muzikor “Gjurmë të Qamilit të Vogël në muzikë”

Mbrëmë, në Prishtinë u promovua monografia dhe albumi muzikor “Gjurmë të Qamilit të Vogël në muzikë” me autorë Krenar Doli dhe Bestar Vula.

Kjo ngjarje kulturore, solli interpretime nga krijimtaria e Qamilit të Vogël, të performuara nga grupi “Rilindja”, po ashtu një pikë artistike nga aktori Jahja Shehu.

Për rëndësinë dhe vlerat e monografisë folën recensentët, Bekim Ramadani dhe Albin Sadiku, si dhe autorët e veprës, të cilët ndanë me të pranishmit procesin e punës dhe motivin që i shtyu të dokumentojnë trashëgiminë muzikore të kësaj figure të shquar.

Ndërsa ministri Hajrulla Çeku, në fjalën e tij tha se është i lumtur që MKRS përkrah projekte e botime të cilat shërbejnë në ruajtjen, kujtimin dhe promovimin e figurave që dhanë shumë për kulturën tonë.

Në emër të familjes së Qamilit të Vogël, e pranishme në këtë promovim ishte vajza e tij, Shqipe Muhaxhiri, e cila shprehu mirënjohjen për këtë projekt që ndriçon veprën dhe jetën e babait të saj, duke e quajtur këtë monografi një urë lidhëse mes brezave dhe një kujtesë të përhershme për kontributin e tij në muzikën shqiptare.