U mbajt prezantim mbi Kontabilitetin Digjital dhe mundësitë për bursa nga Melita & Partners
Në Fakultetin Ekonomik të Universitetit Publik “Kadri Zeka” u mbajt një prezantim nga Melita Ymeraga mbi kontabilitetin digjital dhe mundësitë për bursa dhe trajnime që ofron kompania Melita & Partners.
Në këtë aktivitet, fjalë rasti mbajti edhe Dekani i Fakultetit Ekonomik, Prof. Asoc. Dr. Xhevat Sopi, i cili theksoi rëndësinë e njohurive praktike dhe mundësive që ofrohen për studentët në fushën e kontabilitetit dhe financës digjitale.
Prezantimi u organizua me rastin e 15-vjetorit të aktivitetit profesional të Melita & Partners, e cila ka nisur një fushatë për të promovuar profesionalizmin dhe kontabilitetin dixhital, duke frymëzuar studentët të ndjekin karriera në përputhje me trendet bashkëkohore të teknologjisë dhe tregut global të punës.
Gjatë sesionit, studentët u njohën me të ardhmen e profesionalizmit në kontrollin financiar në epokën digjitale, si dhe me mundësinë për të përfituar bursa të plota trajnimi për një student të dalluar në fushën ekonomike dhe financiare.
Qëllimi kryesor i këtij aktiviteti është të afrojë studentët me realitetin e tregut të punës, duke i trajnuar me aftësi praktike dhe kompetenca që u mundësojnë të konkurojnë edhe në nivel ndërkombëtar.
