Trump: Vrasjet e protestuesve në Iran janë ndalur
Në një deklaratë nga Zyra Ovale presidenti amerikan Donald Trump tha se i ishte thënë se vrasjet në kuadër të shtypjes së protestave kombëtare në Iran po ulen dhe se ai besonte se aktualisht nuk kishte plane për ekzekutime.
“Nuk ka plane për ekzekutime”, tha Trump, duke iu referuar dënimit me vdekje të protestuesit 26-vjeçar Erfan Soltani, për të cilin Sky News raportoi se nuk është ekzekutuar sot. Trump kishte kërcënuar me veprime ushtarake në rast se do të kryheshin ekzekutime.
“Jam i sigurt se nëse ndodh, të gjithë do të shqetësoheshim shumë”, shtoi presidenti amerikan. “Por kjo më është thënë… ata nuk do të kryejnë ekzekutim.”
Grupi për të drejtat e njeriut me seli në Shtetet e Bashkuara raportoi këtë të mërkurë se numri i të vdekurve nga protestat në Iran ka arritur në 2 mijë e 403.
Ky numër po vazhdon të rritet sepse udhëheqësit klerikë të Republikës Islamike po bëjnë përpjekje për ta shtypur valën më të madhe të protestave antiqeveritare ndër vite, duke nxitur kërcënime për ndërhyrje nga SHBA-të.
Trazirat, të nxitura nga kushtet e rënda ekonomike, kanë paraqitur sfidën më të madhe të brendshme për udhëheqësit iranianë për të paktën tre vjet dhe kanë ndodhur në një kohë presioni ndërkombëtar në rritje ndaj Iranit për programet e tij bërthamore dhe të raketave balistike.
