Studentët e FSHK të UKZ-së realizojnë projektin inovativ për digjitalizimin e “Listë Kontrollit” në shkolla
Studentët e vitit të tretë të Fakultetit të Shkencave Kompjuterike në Universitetin Publik “Kadri Zeka” në Gjilan kanë realizuar një projekt të rëndësishëm për modernizimin dhe automatizimin e proceseve arsimore. Projekti i quajtur “Listë Kontrolli” është një sistem digjital i krijuar për të përmirësuar procesin e vetëvlerësimit të nxënësve të shkollave fillore dhe për të mundësuar një lidhje më të ngushtë mes nxënësve, mësuesve dhe prindërve.
Ky projekt është realizuar nga studentët Ubejd Morina, Maldon Misini, Andi Latifi, Ermal Rexhepi dhe Erjon Sylaj, nën udhëheqjen e Prof. Ass. Dr. Aferdita Ibrahimi. Ata kanë punuar për të digjitalizuar një sistem të cilin aktualisht e përdor një shkollë fillore në komunën e Gjilanit në formatin fizik. Ky sistem i vetëvlerësimit u mundëson nxënësve të vlerësojnë progresin e tyre në çdo lëndë dhe të krijojnë mundësi për përmirësim të vazhdueshëm.
Nëpërmjet këtij sistemi, nxënësit mund të identifikojnë pikat e forta dhe ato të dobëta në procesin e të nxënit, duke u ofruar mundësi për zhvillim personal dhe përmirësim të mëtejshëm. Përveç kësaj, mësuesit shqyrtojnë dhe miratojnë vlerësimet e nxënësve dhe ndajnë progresin me prindërit. Administrata menaxhon të dhënat për çdo përdorues, duke mundësuar funksionimin efikas të sistemit për të siguruar që ai të përshtatet me nevojat e individëve që e përdorin.
Dekanja e Fakultetit të Shkencave Kompjuterike, Prof. Dr. Aferdita Ibrahimi, theksoi rëndësinë e këtij projekti duke thënë se ky është një hap i rëndësishëm drejt arritjes së standardeve më të larta të cilësisë në arsim, andaj UKZ do të vazhdoj të mbështes projekte të tilla inovative dhe të qëndrueshme. “Jemi shumë të lumtur dhe krenarë për arritjet e studentëve tanë të vitit të tretë, të cilët kanë realizuar një projekt kaq të rëndësishëm për modernizimin e proceseve arsimore. Ky projekt, “Listë Kontrolli”, është një shembull i shkëlqyer i aftësisë së studentëve tanë për të zbatuar njohuritë e fituara gjatë studimeve dhe për të kontribuar në zhvillimin e teknologjisë që mundëson përmirësimin e arsimimit dhe komunikimit mes nxënësve, mësuesve dhe prindërve”, ka thënë Dekanja Ibrahimi.
Ky projekt është një shembull i shkëlqyer i mënyrës sesi teknologjia mund të përmirësojë cilësinë e arsimit dhe të kontribuoj në zhvillimin e një shoqërie të dijes. Studentët e Fakultetit të Shkencave Kompjuterike kanë demonstruar angazhim dhe kreativitet në përdorimin e teknologjisë për të përmirësuar proceset mësimore dhe për të sjellë mundësi të reja për edukimin e të rinjve.
