Sportistja shqiptare shpallet kampione Evrope në peshëngritje!
Peshëngritësja shqiptare Evangjelia Veli, sapo është shpallur Kampione Europe në stilin e shkëputjes dhe dygarësh për peshën deri në 55 kg në Kampionatin Europian të Peshëngritjes që po zhvillohet në Tiranë, ndërsa mori Medaljen e Argjendtë në stilin e shtytjes.
Sportistja shqiptare, e cila vitin e kaluar kishte siguruar Medaljen e Bronztë në këtë disiplinë, tregoi që në fillim se kërkonte të bënte edhe më mirë dhe të luftonte për majën e podiumit.
Ajo realizoi të tria provat me siguri duke ngritur 91, 93 dhe 95 kilogramë, të cilat i siguruan vendin më të lartë në podium në këtë stil, ndërsa la pas me një kilogram më pak Konotop të Ukrainës dhe Sterck të Belgjikës.
Në stilin e shtytjes Veli realizoi me sukses provën e parë 108 kg, që i mundësoi të pozicionohej mirë me një avantazh të thellë në dygarësh. Prova e dytë e realizuar me sukses prej 111 kg, i dha asaj sigurinë se do të ishte në zonën e medaljeve edhe në dygarësh. Konotop e Ukrainës ngriti 113 kg dhe e kaloi në renditjen e përgjithshme. Por realizimi i së njëjtës peshë nga Veli bëri që të siguronte Medaljen e Argjendtë në këtë stil dhe vendin parë e Medaljen e Artë edhe në dygarësh me peshën e përgjithshme 208 kg.
Kryetari i Bashkisë së Tiranës, Erion Veliaj, dhe Kryeministri Edi Rama kanë uruar peshëngritësen shqiptare, për suksesin në Kampionatin Europian që po zhvillohet në Tiranë.
