S’ka më tolerime, Policia e Kosovës me aksion me gjobat e reja ndaj shoferëve të padisiplinuar

Dhjetë shoferë në dy ditët e fundit janë gjobitur me nga 500 euro nëpër Kosovë për shkelje të rregullave të trafikut.

Më shumë se 5 mijë euro është shuma në total e gjobave që Policia e Kosovës i ka shqiptuar vetëm në dy ditët e fundit.

Ndaj këtyre dhjetë shoferëve janë shqiptuar po ashtu edhe nga pesë pikë negative si dhe ndalim i drejtimit të mjetit për së paku gjashtë muaj.

Katër shoferë janë gjobitur në Gjilan, tre në Ferizaj dhe nga një në Prishtinë, Mitrovicë dhe Deçan.

Një shofer është gjobitur me 400 euro sepse mori pjesë në gara ilegale të shpejtësisë në autostradë. Ai u kap nëpërmjet videos së postuar në rrjetet sociale. Atij gjithashtu i është marrë leja për dhjetë muaj.

Të hënën, ngasësi në Prishtinë është dënuar me 500 euro, pesë pikë negative dhe ndalim i ngasjes për gjashtë muaj për shkak se ka drejtuar automjetin ani pse e kishte të ndaluar nga policia.

Ai kishte përdorur telefonin dhe nuk kishte pajisjet adekuate.

Policia e Kosovës përkohësisht ka konfiskuar një veturë në Mitrovicë dhe ngasësit i është marrë patentë shoferi për gjashtë muaj.

Në zonën e shpejtësisë deri në 60 kilometra në orë, ai kishte drejtuar automjetin me shpejtësi 122 kilometra në orë.

Ndaj tij është shqiptuar gjoba prej 500 eurove, pesë pikë negative dhe marrje e patentë shoferit për gjashtë muaj.

Të hënën në mbrëmje një ngasës është gjobitur me 300 euro, tre pikë negative dhe tre muaj ndalim të drejtimit të automjetit për shkak se në autostradë është kapur në radar duke drejtuar automjetin me shpejtësi 211 kilometra në orë.

Në 24 orët e fundit shqiptuar 1904 gjoba.

Gjatë javës së kaluar vetëm në Prishtinë janë shqiptuar 3 mijë e 806 gjoba për kundërvajtje dhe shkelje të kodit rrugor.