Shpella dhe shpellarët
/Shpella nuk është vetëm një mit, është një realitet i sotëm/
Intelektuali rri i heshtur…!
Shkruan: Nexhat Buzuku
Shpella edhe pas 2500 vitesh vazhdon të mbetet sinonim i territ, injorancës dhe paditurisë.
Shpellarët, pa ta nuk ekziston shpella, ata janë anëtarët e saj, banorët e saj, që nuk pajtohen me botën reale, ata jetojnë në botën ireale të projektuar në kopje të vetvetës!
Iracionalja, paragjykimi, padituria paraqesin trinomin e shpellës!
Shpella s’ka dritare, s’ka dritë, mendja e errësuar mban peng çlirimin e arsyes, ajo mbahet e prangosur në shpellë, e frikësuar…!
Arsyeja e shkretë e ngujuar nuk guxon të shpërfaqet!
Intelektuali e ka humbur identitetin, ai nuk ndihet i gjallë, sepse e ka ndrydhur frika nga turma e injorantëve që i bien në qafë me sulme e kërcënime nga të gjitha mjetet e shkarravinave të tyre, që as alfabetin nuk dinë ta shkruajnë, sepse janë të palexuar!
Në vendin ku dominon shpella e ku injoranca dhe padituria janë shumicë, i dituri, i urti ndihet i pafuqi, i heshtur…dhe duhet të bëhet sikur ata ose të qendrojë larg dhe të përqafojë indiferencën!
Intelektuali nuk duhet të hesht e as të jetë indiferent.
Sepse, nuk mund të shkruash një ditar apo roman lufte duke shikuar luftën nga dritarja (shtëpia).
Atë mund ta bësh duke qenë aty në betejë e në luftë.
Duhet të jesh aty ku zhvillohet jeta (lufta).
Jeta është luftë. Çdo ditë e jetës është një betejë e luftës për jetë.
Nëse ti hesht injoranca do të pushtojë çdo skutë.
Misioni dhe detyra e intelektualit nuk është vetëm të bëjë urime për ditëlindje.
Ai duhet të jetë zëri kundërshtues ndaj të keqes shoqërore.
Ai duhet të jetë zëri i lirisë, drejtësisë e dinjitetit njerëzor.
