Shkarkohet kryeshefi ekzekutiv i KOSTT-it
Bordi i Drejtorëve të KOSTT njofton se në mbledhjen e mbajtur sot, ka marrë vendim për ndërprerjen e marrëdhënies së punës Kryeshefit Ekzekutiv Evetar Zeqiri.
Përmes një komunikate për media Bordi ka theksuar se vendimi është marrë në përputhje me Ligjin për Ndërmarrjet Publike dhe Statutin e KOSTT.
Po ashtu në njoftim bëhet e ditur se në të njëjtën mbledhje, Bordi ka vendosur që Shaban Neziri, aktualisht zëvendës Kryeshef Ekzekutiv, të emërohet si ushtrues detyre i Kryeshefit Ekzekutiv të KOSTT sh.a., deri në një vendim të ri.
“Ju njoftojmë që Bordi i Drejtorëve të KOSTT sh.a në takimin e mbajtur me 24 Prill 2024, në bazë të kompetencave dhe përgjegjësive në përputhje me Ligjin për Ndërmarrjet Publike dhe Statutin e kompanisë, ka marrë vendim që të ndërpresë marrëdhënien e punës të Kryeshefit Ekzekutiv të KOSTT z.Evetar Zeqiri. Me këtë rast, Bordi ka emëruar z. Shaban Neziri, zëvendës Kryeshef Ekzekutiv, si ushtrues detyre i Kryeshefit Ekzekutiv të KOSTT sh.a, deri në marrjen e një vendimi tjetër”, thuhet në njoftim.
Neziri është inxhinier i elektroteknikës dhe është pjesë e KOSTT-it që nga themelimi.
