Ceferin flet për organizimin e evropianit Shqipëri-Serbi: Në rajon çdo gjë kontestohet
Shqipëria priti javën e kaluar një ngjarje historike për vendin dhe futbollin tonë, mbledhjen e Komitetit Ekzekutiv të UEFA-s.
Nën drejtimin e Presidentit Aleksandër Ceferin, KE e UEFA-s mori vendime të rëndësishme për të ardhmen e futbollit evropian.
Në një intervistë ekskluzive dhe të parën për FSHF TV, Presidenti Ceferin shpjegoi arsyen se pse Tirana u zgjodh si mikpritëse e kësaj mbledhjeje të nivelit të lartë, ndërsa foli edhe për bashkë-organizimin e Evropianit U-21 2027 mes FSHF-së dhe Federatës Serbe.
Kreu i qeverisë së futbollit evropian vlerëson punën e FSHF-së ndër vite, ndërsa tregoi edhe mënyrën se si UEFA ndihmon federatat e vogla dhe nëse Shqipëria do të mirëpresë sërish në të ardhmen një tjetër kompeticion madhor evropian.
– President, kjo nuk është hera juaj e parë në Tiranë. Cili është impresioni i vizitës suaj këtu?
– Kam qenë shumë herë në Tiranë, kam vizituar Federatën dhe mikun tim Armand. Është gjithmonë kënaqësi të vij këtu, i shoh ndryshimet në qytet, në infrastrukturë dhe çdo gjë tjetër, që nga vizita ime e parë në 2016 apo pak më herët. Që atëherë, shumë gjëra kanë ndryshuar.
– Mbledhja e Komitetit Ekzekutiv të Uefa-s është një ngjarje historike për futbollin shqiptar. Pse zgjodhët Tiranën për këtë event?
– Prej 3-4 vitesh, në shtator ne shkojmë në një vend të ri dhe mendojmë se Tirana është një vend fantastik për të ardhur, e dinim që organizimi do të ishte i mirë. Ishte një zgjedhje e lehtë për t’u bërë.
