SC Gjilani si në ditët më të mira! – Shënon fitore spektakolare ndaj Llapit
Gjilani ka marrë fitore të thellë ndaj Llapit me rezultat 3-0, në një ndeshje spektakolare nga të besuarit e Debatik Currit.
Vetëm pas tre minutave lojë, Llapi mbeti me një futbollist më pak në fushë, kur kapiteni Axel Gnapi u ndëshkua me karton të kuq pas një ndërhyrje të rëndë në portierin Laroshi.
Megjithatë 45 minutat e para të ndeshjes u mbyllën baras 0-0, me dy skuadrat që krijuan disa raste shënimi.
Gjilani e nisi furishëm pjesën e dytë, pasi në minutën e 47-të Sabit Bilali realizoi nga afërsia për 1-0.
Vetëm 10 minuta më vonë, mbrojtësi Mevlan Adili u gjet bukur në zonë duke dyfishuar rezultatin e Gjilanit në 2-0.
Krejt në fund të ndeshjes, ishte sulmuesi Senad Jarovic që realizoi në minutën e 87-të për rezultatin përfundimtar 3-0.
Me këtë fitore, Gjilani ngritet në pozitën e gjashtë në tabelë me 22 pikë, derisa Llapi mbetet e shtata me 20 sosh.
Xhiron e ardhshme Gjilani luan derbin lokal si mysafire e Dritës, ndërsa Llapi pret Malishevën në Podujevë.
