Agim Ademi viziton legjendën gjilanase Shemsedin Abazi: Futbolli i Kosovës nuk i harron ikonat e tij
Kryetari i Federatës së Futbollit të Kosovës, Agim Ademi, ka vizituar sot një nga figurat më të shquara të futbollit të Gjilanit dhe Kosovës, legjendën Shemsedin Abazi – i njohur për opinionin sportiv si Shema – i cili aktualisht po merr trajtim mjekësor në spital.
Shemsedin Abazi ishte ndër sulmuesit më të spikatur të futbollit kosovar në vitet ’70 dhe ’80, duke lënë gjurmë të pashlyeshme me paraqitjet e tij në klubet gjilanase dhe me kontributin e tij në zhvillimin e futbollit në Kosovë. Shpejtësia, driblimet dhe instinkti i jashtëzakonshëm për gol e bënin atë një nga lojtarët më të dashur për tifozët dhe një figurë që mbetet pjesë e rëndësishme e historisë së futbollit tonë.
Gjatë vizitës, kryetari Ademi pati rastin të bisedojë me Abazin për karrierën e tij të pasur sportive, por edhe për sfidat me të cilat ai po përballet aktualisht, si në aspektin shëndetësor ashtu edhe në atë ekonomik.
Me këtë rast, kryetari Ademi theksoi se Federata e Futbollit e Kosovës do të vazhdojë të qëndrojë pranë figurave që kanë dhënë kontribut të jashtëzakonshëm për futbollin kosovar, duke vlerësuar se përkujdesja dhe respekti për legjendat e sportit është një detyrim moral dhe institucional.
Ai i uroi Shemsedin Abazit shërim sa më të shpejtë dhe rikthim pranë familjes dhe miqve të tij, duke shprehur gjithashtu gatishmërinë që, në bashkëpunim me institucionet dhe komunitetin sportiv, të gjenden forma konkrete mbështetjeje për të në këtë periudhë.
Legjendat e futbollit tonë nuk harrohen kurrë.
