Guxo pranon dorëheqjen e Haxhi Avdylit, reagon Donika Gërvalla: Askush nga partia s’ka linçuar Presidenten
Haxhi Avdyli ka dhënë dorëheqje nga Partia Guxo, ndërsa kryesia e kësaj partie ka bërë të ditur se e pranon vendimin e tij dhe e konsideron atë si zgjedhje personale dhe vullnetare.
Përmes një komunikate për media, kryetarja e partisë Donika Gërvalla njoftoi se lajmin për dorëheqjen e deputetit Avdyli e kanë mësuar përmes mediave dhe rrjeteve sociale.
“Kryesia e Partisë Guxo e pranon këtë dorëheqje dhe e sheh si të drejtën dhe zgjedhjen e tij të vullnetshme dhe të pakontestueshme”, thuhet në reagim.
Në të njëjtën kohë, Guxo falënderoi Avdylin për bashkëpunimin dhe kontributin e tij gjatë periudhës sa ishte pjesë e partisë.
“Në emër të anëtarësisë dhe përkrahësve, Partia Guxo e falënderon deputetin Avdyli për rrugëtimin e përbashkët të deritanishëm dhe kontributin që ka dhënë për Partinë Guxo”, theksohet në komunikatë.
Kryesia e partisë i ka uruar gjithashtu shëndet dhe suksese në angazhimet e tij të ardhshme profesionale.
Në reagim, Guxo ka adresuar edhe pretendimet që janë bërë në publik lidhur me motivet e dorëheqjes. Sipas partisë, askush nga radhët e saj nuk është përfshirë në sulme apo linçime publike ndaj askujt.
“E ndjejmë obligim të konfirmojmë se askush nga Partia Guxo nuk është përfshirë dhe nuk përfshihet as në debate të ulëta dhe as në linçime publike të askujt, e aq më pak të Presidentes së Republikës”, thuhet në reagim.
Partia Guxo thekson se mbetet e përkushtuar për respektimin e rendit, ligjit dhe kushtetueshmërisë në të gjitha zhvillimet politike në vend, përfshirë edhe situatën e fundit politike në Kosovë.
Ndryshe, dorëheqja e Avdylit vjen në një kohë tensionesh në skenën politike dhe raportesh të ftohura mes Presidentes Vjosa Osmani dhe kryeministrit Albin Kurti.
