Roma – Napoli dhe Milan – Lazio, dy përballjet e zjarrta të Serie A këtë fundjavë
Roma – Napoli dhe Milan – Lazio janë dy përballjet më të pritura të kampionatit italian të futbollit këtë fundjavë.
Derbi i zjarrtë mes Romës dhe Napolit luhet të dielën nga ora 20:45 dhe i takon javës së 13-të të Serie A. Do të përballen dy skuadra që luftojnë për titullin e kampionit.
Roma renditet në vendin e parë me 27 pikë, ndërsa Napoli është në vendin e tretë me dy pikë më pak. Napolitanët janë kampionë në fuqi të elitës italiane të futbollit.
Napoli është i pamposhtur në dhjetë nga 11 ndeshjet e fundit kundër Romës në të gjitha garat. Roma dhe Napoli janë përballur në total në 178 ndeshje, ku Roma prin me 66 fitore, Napoli ka 54, ndërsa 58 ndeshje kanë përfunduar baras.
Roma ka regjistruar gjashtë fitore në shtatë ndeshjet e fundit, ndërsa Napoli ka katër fitore, dy barazime dhe një humbje në shtatë ndeshjet e fundit.
Këtë edicion, Roma ka mbrojtjen më të mirë, me vetëm gjashtë gola të pësuar pas 12 xhirove, ndërsa sulmin më të mirë e ka Interi, me 26 gola të shënuar.
Derbi tjetër mes Milanit dhe Lazios luhet të shtunën nga ora 20:45. “Kuqezinjtë” kanë 25 pikë dhe renditen në vendin e dytë. Milani nuk di për humbje në 12 ndeshjet e fundit, me tetë fitore dhe katër barazime.
Lazio ka vetëm një humbje në tetë ndeshjet e fundit dhe ka 18 pikë në vendin e tetë të tabelës.
Xhiroja e 13-të përfundon të hënën me ndeshjen Bologna – Cremonese, e cila nis po ashtu nga ora 20:45.
