Rektori i UKZ-së priti në takim Ministren e MASHTI-t
Rektori i Universitetit Publik “Kadri Zeka” në Gjilan, Prof. Asoc. Dr. Artan Dërmaku, së bashku me bashkëpunëtorët e tij, ka pritur sot në takim Ministren e Arsimit, Shkencës, Teknologjisë dhe Inovacionit, Arbërie Nagavci dhe ekipin e saj.
Në këtë takim, Rektori Dërmaku falënderoi Ministren Nagavci për vizitën dhe përkushtimin e saj ndaj Universitetit të Gjilanit, duke theksuar nevojën për mbështetje të mëtejshme për zhvillimin e infrastrukturës dhe mundësitë e avancimit të kushteve për procesin mësimor. Një nga temat kryesore të diskutimit ishte ndërtimi i kampusit universitar, që është një prioritet i rëndësishëm për universitetin dhe komunitetin akademik të rajonit të Gjilanit dhe më gjërë.
Rektori Dërmaku theksoi se ndërtimi i kampusit është një nevojë urgjente, pasi universiteti përballet me mungesë të hapësirave për zhvillimin e aktiviteteve mësimore dhe kërkimore. Ai shpjegoi se, ka vullnet nga të gjitha palët për të realizuar këtë projekt madhor, i cili do të kontribuonte në ngritjen e cilësisë së arsimit dhe zhvillimin e mëtejshëm të universitetit.
“Ndërtimi i kampusit universitar është një projekt jetik për Universitetin e Gjilanit. Ne kemi një nevojë të madhe për hapësira të reja që mundësojnë zhvillimin e një ambienti më të mirë për studentët dhe stafin. Kjo është një mundësi që do të kontribuonte në ngritjen e nivelit të arsimit në qytet dhe në rrethinë,” tha Rektori Dërmaku gjatë takimit.
Për Ministren Nagavci, ndërtimi i kampusit universitar është një hap i domosdoshëm për avancimin e arsimit të lartë në Kosovë. Ajo shprehu gatishmërinë e Ministrisë për të mbështetur këtë iniciativë dhe për të shqyrtuar mundësitë për sigurimin e fondeve dhe mbështetjes financiare për këtë projekt. Ministrja Nagavci po ashtu theksoi rëndësinë e bashkëpunimit me komunën e Gjilanit për sigurimin e hapësirave të nevojshme për ndërtimin e kampusit, duke garantuar që fondet e IPA-së (Instrumenti i Para-Aderimit) mund të përdoren për këtë qëllim.
“Ne duhet të gjejmë një zgjidhje të përbashkët për sigurimin e hapësirave të nevojshme për ndërtimin e kampusit dhe jam e bindur që me vullnetin e duhur, do të mund të realizojmë këtë projekt të rëndësishëm për universitetin dhe studentët e Gjilanit,” theksoi Ministrja Nagavci.
Në këtë kontekst, Rektori Dërmaku përmendi se, fokusimi është te sigurimi i hapësirave të përshtatshme për ndërtimin e kampusit. Ai theksoi se, universiteti është i gatshëm për të realizuar investimet e nevojshme për krijimin e një infrastrukture moderne dhe funksionale, që do të mundësojë zhvillimin e proceseve mësimore dhe kërkimore në kushte më të mira.
Pas diskutimeve, Ministrja Nagavci dhe ekipi i saj vizituan ambientet e universitetit, ku panë nga afër sallat e mësimit, kabinetet dhe hapësirat e tjera të cilat janë pjesë e procesit mësimor dhe akademik. Gjatë vizitës, ata kishin mundësinë të shqyrtonin më në detaje kushtet aktuale dhe nevojat për zhvillimin e mëtejshëm të infrastrukturës, duke theksuar rëndësinë e një mbështetjeje të vazhdueshme dhe të qëndrueshme nga institucionet shtetërore për realizimin e projekteve madhore, si ndërtimi i kampusit universitar.
