Reagon Lutfi Haziri, prezantimin e projektit të Bulevardit nga kryetari Alban Hyseni e quan “skandal të radhës për ta dështuar projektin”
Ndërkohë që kreu i Komunës së Gjilanit Alban Hyseni, ka përfunduar së prezantuari projektet infrastrukturore që mëton t’i realizoj gjatë mandatit të tij, nën moton “7 javë 7 projekte”, ish kryetari Lutfi Haziri, njëherit kryetar i degës së LDK-së, i ka kritikuar ato projekte sa herë që janë prezantuar.
Kështu ka ndodhur edhe me prezantimin e projektetit të fundit për sheshin e qytetit nga ana e z. Hyseni, të cilin projekt z. Haziri e ka quajtur “skandal i radhë… ”.
“Tendenca për ta ndryshuar rregullimin e Bulevardit “Ibrahim Rugova”, është skandal i radhës për ta dështuar projektin”, ka shkruar Haziri në faqen e tij në facebook.
“Pas dështimeve frapante e stagnimeve në autostradë, në impiantin e ujërave të zeza në Uglar, te rrugët regjionale për Kllokot/Ferizaj/Prishtinë/Bujanoc, stadiumin e qytetit, sheshin mbi lumin Mirusha në pjesët veriore dhe jugore, pastrimin, rregullimin dhe rikthimin e pendës së Livoçit në qendër rekreative e edukative, rregullimi i trotuareve në Dardania 2 dhe Deremahallë, administratori i Komunës paska prezantuar një ‘projekt’ për bulevardin e qytetit”, ka vijuar më tej Haziri.
Reagimi i plotë i kryetarit të degës së LDK-së në Gjilan, z. Lutfi Haziri
Tendenca për ta ndryshuar rregullimin e Bulevardit “Ibrahim Rugova”, është skandal i radhës për ta dështuar projektin
Pas dështimeve frapante e stagnimeve në autostradë, në impiantin e ujërave të zeza në Uglar, te rrugët regjionale për Kllokot/Ferizaj/Prishtinë/Bujanoc, stadiumin e qytetit, sheshin mbi lumin Mirusha në pjesët veriore dhe jugore, pastrimin, rregullimin dhe rikthimin e pendës së Livoçit në qendër rekreative e edukative, rregullimi i trotuareve në Dardania 2 dhe Deremahallë, administratori i Komunës paska prezantuar një ‘projekt’ për bulevardin e qytetit.
Kjo tendencë për ta ndryshuar rregullimin e Bulevardit “Ibrahim Rugova”, është skandal i radhës për ta dështuar projektin. Kjo është edhe një përpjekje e radhës për ta bërë sa më monumental mashtrimin.
Nuk pritet asgjë më shumë nga qeverisja e lloçit, mykut, stagnimit, skandaleve dhe mizevirave. Krejt çka dinë këta është me ble ndonjë kamion në formë pazarishte, pa procedura të prokurimit, duke e zhvendosur Komunën dhe rolin e saj në marionetë skandaloze.
Po dëshmohet për tri vite e do të dëshmohet edhe për këta muaj sa u kanë mbetur se mashtrimin e kanë logjikë të administrimit.
Gjilani meriton shumë më shumë dhe shumë më mirë!
