Reagon ashpër Prof. dr. Bahtijar Kryeziu, denoncon abuzuesin e pronësisë intelektuale!
Një ngjarje e pazakontë ka ndodhur të premten, 31 mars 2023, e cila lidhet me pronësinë intelektuale.
Bëhet fjalë për reagimin e Prof. dr. Bahtijar Kryeziu, bashkëautor i librit “Gjuhë amtare – Njohuri për gjuhën, Fonetikë, Morfologji, Sintaksë (tekst Universitar, lejuar nga Universiteti i Prishtinës dhe Universiteti i Korçës, me autorë: Prof. dr. Ali Jashari – Prof. dr. Bahtijar Kryeziu, adresuar një njoftimi në murin e tij në facebook, të cilin e cilëson “të pazakontë”.
Siç mësohet nga njoftimi, “një imitues, kompjues e falsifikues” i cilësuar i pronësisë intelektuale, apo mbase student, ka provuar të shfrytëzoj murin e profesorit të nderuar në facebok, si një lloj njoftimi-oferte, për shitjen apo stërshitjen e vëllimit të botuar si bashkëautor të librit të profesorit të nderuar, me titull: “Gjuhë amtare – Njohuri për gjuhën, Fonetikë, Morfologji, Sintaksë”, ka publikuar ofertë stërshitje pa lejen e autorëve madje me çmim të fryer krahasuar me atë real.
“Një pirat/e, falsifikator/e, kusar/e, ka publikuar kopertinën e librit “Gjuhë amtare – Njohuri për gjuhën, Fonetikë, Morfologji, Sintaksë (tekst universitar, lejuar nga Universiteti i Prishtinës dhe Universiteti i Korçës, me autorë: Prof. dr. Ali Jashari – Prof. dr. Bahtijar Kryeziu, pa lejen e autorëve”, ka shkruar veç tjerash Prof. dr. Bahtijar Kryeziu, duke shfaqur pezmin e tij të thellë me abuzimin e skajshëm me pronësinë intelektuale.
Reagimi i Plotë:
Reagim!
Sot, më 31 mars 2023, në orën 9:30 minuta, në llogarinë time, në fb, pashë një postim – njoftim të pazakontë!
Një pirat/e, falsifikator/e, kusar/e, ka publikuar kopertinën e librit “Gjuhë amtare – Njohuri për gjuhën, Fonetikë, Morfologji, Sintaksë (tekst universitar, lejuar nga Universiteti i Prishtinës dhe Universiteti i Korçës, me autorë: Prof. dr. Ali Jashari – Prof. dr. Bahtijar Kryeziu, pa lejen e autorëve.
Çmimin që kishte caktuar “autori” pirat, me siglën “V vlera e librit”, ishte 11 euro për në Kosovë dhe 13 euro për blerësit nga Maqedonia e Veriut dhe Shqipëria.
Njoftoj publikun se ai postim nuk është yni. Libri që kemi ne është në shitje në librarinë “Artini” në Prishtinë dhe në librarinë “ABC” në Gjilan me çmim 8 përkatësisht 7 euro, tekst universitar që ka 4 pjesë (Njohuri për gjuhën * Fonetikë * Morfologji * Sintaksë), nga shitja e të cilit libër, heq rabatin e librarisë dhe shpenzimet e botimit nuk mbeten më tepër se 2 euro për autorët.
Si njëri nga autorët e tekstit deklaroj publikisht se asnjëherë nuk kam shitur libër në dorë e as që kam kushtëzuar ndonjë student nga qindra e mijëra që ju kam mbajtur ligjërata, me ç’rast kërkoj nga akëcili student që publikisht të deklarohet nëse nuk qëndron kjo dëshmi imja. Madje, derisa kam qenë aktiv në mësim, çdo fillimviti ju kam dhënë falas nga 5-10 ekzemplarë studentëve në nevojë.
Pas reagimit që bëra në fb, te njoftimi i kusarit, i cili e kishte shpërndarë 16 herë “biznesin e tij” më bllokoi, porse rasti është paraqitur në organet kompetente, me dëshminë e siglës dhe të kopertinës, me qëllim të ndaljes së hajnisë, jo vetëm të këtij rasti.
Autori,
Prof. dr. Bahtijar Kryeziu
31 mars 2023
