Prishtinë: Hajnat thyejnë një banesë dhe vjedhin gjësende në vlerë të mbi 13 mijë eurove
Një fenomen mjaft shqetësues për qytetarët e Kosovës janë bërë vjedhjet e shpeshta nëpër shtëpi, që po shkaktojnë ankth e pasiguri, sidomos kur shtëpitë mbesin pa përkujdesje. Kështu ka ndodhur edhe në një banesë në Prishtinë, ku hajnat kanë arritur ta thyejnë derën dhe të kryejnë vjedhje.
Burimet brenda Prokurorisë kanë bërë me dije se vjedhja ka ndodhur së fundmi dhe është denoncuar nga pronarja e banesës, e cila ka raportuar se hajnat kanë vjedhur gjësende që kapin vlerën e mbi 13 mijë eurove.
Bazuar në dëshminë e saj, të dhënë para hetuesve, hajnat kanë depërtuar me forcë, duke e thyer banesën, me ç’rast kanë arritur të kryejnë vjedhjen.
Si rezultat i denoncimit, njësitë policore kanë dalë në vendin e ngjarjes ku kanë kryer ekzaminimet e nevojshme që ndihmojnë në zbardhjen e rrethanave të rastit dhe në identifikimin e personave të dyshuar
Me urdhër të prokurorit, rasti është iniciuar ‘Vjedhje e rëndë’, ndërsa veprimet tjera ligjore do merren posa të kapen të dyshuarit.
