Portrete e personalitete: – Doktor Ilaz Selimi nga Malësia e Bujanocit, personalitet i llojit të vet, unik me humanizmin e tij
Ilaz Selimi, apo sic njihej në mesin e popullatës – Doktor Ilazi, i cili punoi si mësues e punëtor shëndetësor, ishte i njohur në trevën e Hashanisë dhe Malësi të Bujanocit si veprimtar i devotshëm, humanist i madh dhe atdhetar i flaktë.
U lind mw 21 janar 1928 në Fshati i Ri (Novosellë) – Komuna e Bujanocit. Vdiq më 5 prill 1998 dhe u varros në vendlindje.
Për punën e hershme si infermier banorët e Malësisë e njihnin si njeri të palodhshëm e të gatshëm për ndihmë, i cili shëtiste shtëpi më shtëpi për t’u dalë në ndihmë. Ai, madje thuhet se shiti pasurinë private për ta rregulluar rrugën për Malësi të Bujanocit.
Për Doktor Ilazin janë shkruar e ilustruar shkrime e ilustrime të ndryshme dhe artikuj të shumtë: është ngritur një pllakë përkujtimore si dhe është shkruar libri “Doktor Ilazi – një humanist i madh”.
Në vitin 2015 Komuna e Bujanocit, për ta nderuar figurën atdhetare dhe humaniste të doktor Ilazit e emëruan edhe një rrugë të qytetit me emrin e tij.
Figura emblematike shumëdimensionale e doktor Ilazit është shumë më shumë se një libër, është një dyzynë librash, është një biografi e bibliografi më vete, ndryshe nga ç’ka njohur e parë treva e Hashanisë, Anamorava e shumë më gjërë.
Ai është një lapidar emblematik, përtej vlerësimit human, letrar e kronik, i devotshëm i thjeshtë për t’u cilësuar, porse kompleks e voluminoz për t’u trajtuar nga autorët e përditshmërisë së realitetit aktual.
E për t’u trajtuar me përmasat meritore, figura e doktor Ilazit paraprakisht duhet të studiohet e analizohet gjërë e gjatë, nga akëcili autor eventual që do merrte mundin e guximin t’i rrekej një biografie apo stufimi të gjërë të jetës e veprimtarisë së tij!
