Policia arreston aktivistët që protestuan te ZRRE kundër shtrenjtimit të rrymës, publikohen pamjet
Policia e Kosovës ka arrestuar disa aktivistë të grupit “Asnji Cent Ma Shumë”, që bllokuan dyert e Zyrës së Rregullatorit Energjetik, të cilët po kundërshtojnë shtrenjtimin e rrymës.
Në njoftimin e këtij grupi thuhet se janë arrestuar 12 aktivistë. Madje, pretendohet edhe se janë rrahur.
“Pas Presidentes, Ministrisë së Ekonomisë dhe ZRrE-së, stafeta kaloi te Policia e Kosovës. Të gjithë në mbrojtje të interesit privat. Të gjithë bashkë në ruajtjen dhe garantimin e përfitimeve të KEDS-it. Presidentja e Qeveria përmes ZRrE-së, përmes propozimeve dhe vendimeve politike kurse policia e Kosovës përmes grushtave dhe shufrave metalike. Në orën 8, kur edhe fillon orari zyrtar i punës së ZRrE-së, ne aktivistët/et e iniciativës Asnji Cent Ma Shumë kemi bllokuar zyret e ZRrE-së. Me zell të pakuptueshem nga ana e pjesëtarëve të policisë, janë arrestuar dhe rrahur 12 aktivistë/e. Janë rrahur egërsisht vetëm pse po protestonin kundër rritjes edhe ashtu të rritur të çmimit të energjisë. Të rrahur/a dhe të arrestuar/a po mbahen në polici. Ne kerkojmë lirimin e menjëhershëm të tyre, kurse qytetarët/et i ftojmë të na bashkohen te zyret e ZRrE-së. Asnji zyrtar i ZrRE nuk mund të punojë aty. Jo deri në një zotim se nuk kanë për të aprovuar asnjë rritje. Deri atëherë ai nuk është vendi i tyre i punës. Deri atëherë ne jemi dhe duhet te jemi në bllokadë”, thuhet në njoftim.
Në mesin e të arrestuarve është edhe analisti Dibran Hoxha. Ai tha se Policia “na kanë shkel me qizme në kry e në këmbë”. Nga Policia ende s’janë deklaruar për rastin.Burimi i lajmit: /Reporteri.net
