Pesë vjet burgim për marokenin që kritikoi mbretin në Facebook
Një maroken është dënuar me pesë vjet burgim për kritikën që ia bëri mbretit në Facebook për normalizimin e marrëdhënieve të vendit me Izraelin, ka thënë avokati i tij, shkruan The Guardian.
Said Boukioud, 48 vjeç, u burgos të hënën për postime që denonconin normalizimin “në një mënyrë që mund të interpretohej si kritikë ndaj mbretit”, ka thënë avokati El Hassan Essouni, duke shtuar se vendimi ishte apeluar.
Sipas kushtetutës së vendit, punët e jashtme janë prerogativë e monarkut, mbretit Mohammed VI. Maroku dhe Izraeli normalizuan marrëdhëniet në dhjetor 2020 si pjesë e Marrëveshjes së Abrahamit të mbështetur nga SHBA-ja.
“Vendimi i gjykatës së Casablancas për dënimin me pesë vjet burgim është i ashpër dhe i pakuptueshëm”, ka thënë avokati.
Ai shtoi se pavarësisht nga kundërshtimi i klientit të tij për lidhjet me Izraelin, ai nuk kishte ndërmend të ofendonte mbretin.
Postimet në Facebook datojnë nga fundi i vitit 2020, kur Boukioud jetonte dhe punonte në Katar.
Ai i fshiu postimet dhe mbylli llogarinë e tij kur mësoi se po ndiqej penalisht në Marok, sipas avokatit.
Boukioud u dënua sipas nenit 267-5 të kodit penal, i cili përcakton dënim prej gjashtë muajsh deri në dy vjet për këdo që minon monarkinë.
Por ky dënim mund të rritet në pesë vjet nëse një vepër kryhet publikisht, duke përfshirë edhe mjetet elektronike.
Aktivistët e të drejtave të njeriut thonë se ligji pengon lirinë e shprehjes dhe formulimi i tij “nuk specifikon saktësisht se çfarë mund të përbëjë një sulm” ndaj monarkisë.
