Përfaqësues të UKZ-së pjesëmarrës të konferencës shkencore në UT në Shqipëri dhe në zhvillimin e projektit DUALKO
Prorektori për Bashkëpunim Ndërkombëtar dhe Projekte në Universitetin Publik “Kadri Zeka” në Gjilan, Prof. Dr. Dukagjin Leka, së bashku me Dr. Sc. Berat Dërmakun dhe Petrit Canaj, Sekretar i Njësisë Akademike, kanë qëndruar në Shqipëri në kuadër të aktiviteteve akademike dhe projekteve ndërkombëtare.
Vizita është realizuar me rastin e pjesëmarrjes në konferencën shkencore të organizuar në bashkëpunim me Universitetin e Tiranës, ku Universiteti Publik “Kadri Zeka” ka qenë bashkëorganizator. Po ashtu, gjatë kësaj vizite është trajtuar edhe projekti Erasmus+ CBHE “Strengthening of relations between HEIs and industry sector through Dual Education in Albania and Kosovo with the focus on ICT – DUALKO”, në të cilin UKZ është partnere.
Projekti DUALKO koordinohet nga Universiteti i Elbasanit dhe ka për qëllim forcimin e lidhjeve ndërmjet institucioneve të arsimit të lartë dhe sektorit të industrisë përmes modelit të edukimit dual, me fokus të veçantë në fushën e Teknologjisë së Informacionit dhe Komunikimit (TIK).
Ky projekt synon të aplikojë praktikat më të mira evropiane të edukimit dual, të bazuara në përvojat e vendeve të Bashkimit Evropian si Austria, Polonia dhe Qipro, të cilat kanë një traditë të avancuar në këtë formë të arsimit.
Universiteti Publik “Kadri Zeka” po vazhdon me sukses rrugën e tij të zhvillimit dhe ndërkombëtarizimit, duke integruar praktikat evropiane brenda institucionit, të cilat do të kontribuojnë drejtpërdrejt në ngritjen e mëtejme të cilësisë së arsimit të lartë në Republikën e Kosovës.
