Osmani: Të hiqen masat, në fokus të dialogut njohja reciproke
Presidentja e Kosovës, Vjosa Osmani, kërkoi nga BE-ja të hiqen masat e padrejta ndaj Kosovës, të cilat, siç tha, po dëmtojnë interesat e qytetarëve dhe projektet kyçe.
Ajo gjithashtu kërkoi që aplikimi i Kosovës për anëtarësim në BE të trajtohet me prioritet.
Këto komente presidentja Osmani i bëri në konferencën e përbashkët me presidentin e Këshillit Evropian, Antonio Costa, pas takimit të tyre .
“Shpresojmë që shtetet anëtare më në fund të pajtohen që të hiqen masat e padrejta ndaj Kosovës, të cilat po dëmtojnë interesat e qytetarëve tanë dhe projektet kyçe që lidhen me integrimin evropian. Këtë verë bëhen dy vjet me masa dhe çdo minutë e më shumë është minutë padrejtësie. Është koha edhe të trajtohet aplikimi ynë për anëtarësim dhe ky dokument mos të mbetet vetëm dokument i arkivuar, por ky aplikacion të trajtohet me prioritet”, tha Osmani.
Presidentja Osmani kërkoi një frymë të re në dialogun Kosovë-Serbi.
“Fokusi kryesor i këtij procesi duhet të jetë njohja reciproke, sepse përndryshe nuk do të kontribuonte për paqe afatgjatë. Vizita e Vuçiqit në Moskë, në një kohë lufte, tregon se nuk mund të pritet shumë. Për një vend që sillet kështu do të duhet të kishte edhe veprime të ndërmarra ndaj lidershipit të atij vendi. Për Kosovën, BE përherë ka qenë rruga e vetme, jo njëri nga opsionet. Nuk do të duhej një gjë e tillë që të merret si e mirëqenë, sepse me kë bashkëpunojmë, kjo duhet të ketë rëndësi”, tha Osmani.
Presidentja e Kosovës, tha se kjo vizitë e presidentit të Këshillit Evropian është një dëshmi konkrete e angazhimit të BE-së për Kosovën dhe për të ardhmen e rajonit tonë.
“Vizioni juaj për zgjerimin e BE-së si projekt strategjik është më i domosdoshëm se kurrë, sepse në kohë si këto, kur zhvillimet politike dhe sigurisë globale janë të paparashikueshme, nevoja për hapa të guximshëm është, jo thjesht një opsion, por domosdoshmëri. Kosova është gati të ec përpara në rrugën e saj të integrimit evropian, institucionet tona po forcohen vit pas viti. Qytetarët tanë janë më proevropianët në tërë rajonin. Është koha që të reflektohet me hapa konkretë për integrimin në BE. Presim Kosovës t’i hapen dyert drejt BE-së”, tha presidentja Osmani.
Ajo bëri të ditur se në takim diskutuam edhe për Planin e Rritjes të BE-së për Ballkanin Perëndimor.
