Njazi Ameti, pedagogu i parë i shkollës “Selami Hallaqi”, gjatë viteve të 90-të
Ka punuar plotë 18 vjetë, 7 muaj e 1 ditë para luftës në Kosovë, duke u përballur me peripeci e sakrifica të shumëta.
Ndonëse ka pasur aktivitete tjera gjatë asaj periudhe, vendin e punës e ka mbajtur pa munguar, edhe pse nuk merrte pagë!
Gjatë kohës sa ka punuar në arsim, një periudhë kohore ka pasur vështirësi të jashtëzakonshme, pasi është përballur me domosdoshmërinë e mbajtjes së punës në shkollë, duke ia dalë mbanë me këmbëngulësi e devotshmëri, përkundër nevojës madhe në shtëpi për t’u kujdesur për prindin e sëmurë.
Ai ka udhëtuar çdo ditë nga Konçuli i komunës së Bujanocit për të mbajtur vendin e punës në Shkollën “Selami Hallaqi” në Gjilan, edhe pse asokohe pa pagë, nga fillimi i viteve 90-të kur punëtorët e arsimit shqip u dëbuan nga shkollat.
Njazi Ameti, si gjithë të tjerët u detyruan që në bazë vullnetare të mbajë punën, por sfidat e tij ishin më ndryshe, pasi ishte i detyruar të udhëtoj çdo ditë nga 50 kilometra vajtje-ardhje, Konçul – Gjilan dhe anasjelltas, për ç’gjë nuk denjon asnjehere që me devotshmëri e mirënjohje të shprehet falënderues ndaj dy kompanitë transportuese të asaj periudhe kohore, ‘Kaolini’ dhe ‘Alp Comerc’, për të cilat thotë se atë dhe kolegët e tij i kanë bartur pa kompensim, madje për vite të tëra, në shërbim të prcesit arsimor sa më afikas në ato rrethana.
Z. Ameti nuk ka zgjedhur alternativa se si ta ndihmojë procesin mësimor asokohe. Është kujdesur me devotshmëri e motivim të pashoq madje edhe për sigurimin e mjeteve themelore të punës, shkumësave etj, të cilat i ka transportuar nga Lugina e Preshevës për në Gjilan, ndërsa ka qenë aktiv edhe në grumbullimin e mjeteve për sigurimin e lëndëve djegëse përmes miqëve e shokëve të tij në Luginë, vetëm e vetëm për të mbajtur gjallë jetën arsimore në Gjilan e gjetiu.
Pedagogu Njazi Ameti asnjëherë nuk ka menduar ta braktisë punën në shkollën “Selami Hallaqi” ku ka punuar atëbotë, përkundër mundësive që të punoj gjetiu në kushte më të mira. Aty ai është përkushtuar me tërë kapacitetet e tij, si intelektuiale ashtu edhe human e patriotik, vetëm e vetëm t’i qëndrojë besnik deri në ditën e fundit shërbimit të tij në mbajtjen gjallë të arsimit shqip në Kosovë, që atëbotë ishte atakuar skajshmërisht nga regjimi serb i viteve 90-të.
