Nënshkruhet memorandum i bashkëpunimit ndërmjet UP-së dhe Universitetit të Zagrebit
Nënshkruhet memorandum bashkëpunimi ndërmjet Universitetit të Prishtinës, përkatësisht, Fakultetit të Filologjisë dhe Fakultetit të Shkencave Humane dhe Shoqërore të Universitetit të Zagrebit, me fokus shkëmbimin e stafit akademik, të studentëve dhe të zhvillimit të bashkëpunimeve të reja në fushën e shkencave filologjike në veçanti dhe të atyre humanistike e sociale në përgjithësi.
Memorandumi u nënshkrua si vazhdimësi e një bashkëpunimi konkret ndërmjet Qendrës së Gjuhëve “Croaticum” në Universitetin e Zagrebit dhe Qendrës së Gjuhëve të UP-së, të shkëmbimit të lektorateve nëpërmjet marrëveshjes ekzistuese ndërministrore Kosovë – Kroaci, të iniciuar më herët e që pritet të vazhdojë edhe gjatë vitit të ardhshëm akademik.
Memorandumi i bashkëpunimit u nënshkrua nga dekanët, prof. dr. Lindita Sejdiu – Rugova dhe prof. Domagoj Tonçiniq, në praninë e prodekanëve të këtyre fakulteteve.
Gjatë vizitës së saj në Universitetin e Zagrebit, dekanja Rugova ka takuar edhe drejtorin e Qendrës së gjuhës kroate për të huajt, Croaticum, dr. Antonio Juriçiq, përfaqësues të tjerë të kësaj qendre, si dhe me udhëheqësin e programit të studimeve të Evropës Juglindore, program i cili do të zhvillohet në gjuhën angleze, por në të cilin shqipja pritet të ofrohet krahas gjuhëve të tjera të Evropës Juglindore si lëndë zgjedhore.
