Në UKZ u përurua Laboratori i Shkencave Sociale – investim i Telkos
Në një ceremoni solemne, sot u bë përurimi i Laboratorit të Shkencave Sociale në Fakultetin e Shkencave Sociale të Universitetit Publik “Kadri Zeka”, një hapësirë moderne e ndërtuar me mbështetjen financiare të kompanisë Telkos.
Shiritin e inaugurimit e prenë Rektori i UKZ-së, Prof. Asoc. Dr. Artan Dërmaku, Dekani i Fakultetit të Shkencave Sociale, Prof. Asoc. Dr. Selim Daku, si dhe pronari i kompanisë Telkos, z. Avni Haziri.
Dekani i Fakultetit të Shkencave Sociale, Prof. Asoc. Dr. Selim Daku, pasi falënderoi kompaninë Telkos për mbështetjen financiare, vlerësoi hapjen e laboratorit si një arritje të madhe për fakultetin dhe për UKZ-në. Ai theksoi se ky laborator do të jetë një qendër moderne për zhvillimin praktik të studentëve dhe një bazë e rëndësishme për hulumtime të avancuara në fushën e shkencave sociale. “Laboratori do të shërbejë për analiza statistikore, sondazhe, intervista, si dhe metoda të tjera bashkëkohore të kërkimit. Studentët tanë do të kenë mundësi të aplikojnë njohuritë e tyre në mënyrë praktike dhe të marrin përvojë të drejtpërdrejtë në fushën e hulumtimit,” tha Dekani Daku. Po ashtu, ai ka njoftuar se Fakulteti i Shkencave Sociale ka angazhuar për mbajtjen e ligjëratave në lëndë të caktuara, Deputeti austriak në Parlamentin Evropian Lukas Mandl, i cili mban titullin “Doctor Honoris Causa” nga Universiteti Publik “Kadri Zeka” në Gjilan, duke e bërë këtë laborator edhe më të vlefshëm për procesin mësimor.
Rektori Prof. Asoc. Dr. Artan Dërmaku falënderoi kompaninë Telkos për mbështetjen dhe Dekanin e Fakultetit të Shkencave Sociale për angazhimin në realizimin e këtij projekti. Ai nënvizoi se laboratori është një vlerë e shtuar për universitetin dhe një mundësi e re për studentët e shkencave sociale. “Ky është një investim që i jep një dimension të ri Fakultetit të Shkencave Sociale, por edhe tërë Universitetit tonë. Dua të falënderoj Dekanin për angazhimin e tij dhe inkurajoj edhe dekanët e tjerë të fakulteteve që të punojnë në këtë drejtim. Mbështetjen e menaxhmentit do ta keni gjithmonë. Hapësirat tashmë ekzistojnë, nevojitet vetëm punë dhe përkushtim për programe të reja studimore dhe projekte inovative,” theksoi Rektori Dërmaku.
Drejtori i kompanisë Telkos, z. Vedat Morina, theksoi se ky investim është i dedikuar për rininë e Kosovës dhe se kompania që ai drejton do të vazhdojë të mbështesë arsimin dhe projektet që lidhen me të ardhmen e gjeneratave të reja në Kosovë. “Është krenari për ne që kemi pasur mundësinë të investojmë në dije. Ky laborator është për të rinjtë e Kosovës, për gjeneratat që janë fuqia e shtetit. Urojmë që ky laborator të shfrytëzohet maksimalisht, që të krijoni më të mirën dhe të arrini rezultate konkrete,” u shpreh drejtori Morina.
Laboratori i Shkencave Sociale do të shërbejë si një hapësirë moderne për studentët dhe stafin akademik të FSHS-së, duke u mundësuar atyre të zhvillojnë projekte kërkimore mbi diplomacinë, integrimin evropian, marrëdhëniet ndërkombëtare dhe politikat publike.
Ai do të krijojë mundësi për analiza statistikore, mbledhje të të dhënave, përpunim dhe vizualizim grafik me softuerë të avancuar, si dhe përdorim të databazave ndërkombëtare. Për më tepër, laboratori do të jetë një hapësirë bashkëpunimi me institucione publike, OJQ, biznese dhe universitete të tjera evropiane, duke kontribuar në shkëmbimin ndërkombëtar të ideve dhe përvojave.
