Në Kamenicë kremtohet “ndryshe” semimatura!
Komuna e Kamenicës, gjegjësisht Drejtoria për Arsim në Kamenicë, ka organizuar një mënyrë “ndryshe”, madje unike, për ndarjen e dëftesave të nxënësve semimaturantë!
“Mbahet tubimi solemn për ndarjen e dëftesave për semimaturantët 2023, organizuar nga Drejtoria e Arsimit në Kamenicë”, thuhet në një njoftim të publikuar nga pedagogë e drejtues institucionesh të arsimit në këtë komunë.
Në këtë festë të diplomimit, nxënësit kanë defiluar me kostume e kapela, njësoj si në raste të ceremonive të diplomimit të kadetëve ushtarak e atyre policorë apo edhe studentëve në universitete e kolegje, shkruan TV Gjilani.
Ndonëse kjo mënyrë e kremtes të të diplomuarve në këtë fazë duket paksa e ekzagjeruar, nga këndvështrimi i banorëve të shumtë të kësaj komune duket aspak e vecantë.
Kjo sepse e kaluara e nxënësve dhe shkollave të kësaj komune, në kuadër të reformave të proklamuara vite me radhë, ka qenë mjaft sfiduese, pasi kishte çuar deri te mbyllja e përkohshme e disa objekteve shkollore, për ç’gjë shumica e banorëve lokal asnjëherë nuk ishin pajtuar me nismën e reformës, ndaj rikthimi i nxënësve nëpër shkollat e tyre rezultoi me festimin e përfundimit të vitit shkollor ndryshe nga shkollat e komunave tjera.
