Mbledhja e KPK’së: Betohet anëtarja Elza Bajrami Kastrati – prokurori Milot Krasniqi pezullohet përkohësisht nga detyra

Këshilli Prokurorial ka mbajtur sot mbledhjen e radhës, ku janë marrë disa vendime.

Në këtë mbledhje, anëtarja e zgjedhur nga radhët e prokurorive themelore, Elza Bajrami-Kastrati, ka bërë betimin solemn para Këshillit, duke marrë zyrtarisht detyrën.

Sipas njoftimit të KPK’së, është miratuar edhe kërkesa për pezullimin e përkohshëm nga detyra të prokurorit të shtetit, Milot Krasniqi, anëtar i Këshillit nga Prokuroria Speciale e Republikës së Kosovës, si dhe kërkesën e prokurores së shtetit nga Prokuroria Themelore në Prishtinë, Elza Bajrami, anëtare e sapozgjedhur e Këshillit, të cilët do të vazhdojnë angazhimin e tyre në kuadër të KPK-së.

Është miratuar edhe Rregullorja për zgjedhjen e Kryesuesit dhe Zëvendëskryesuesit të Këshillit Prokurorial të Kosovës, “me qëllim të rregullimit të procedurave dhe garantimit të një procesi transparent dhe të drejtë zgjedhor brenda Këshillit”.

Njoftimi i plotë i KPK’së:

Prishtinë, 6 mars 2026 – Këshilli Prokurorial i Kosovës (KPK), nën kryesimin e ushtruesit të detyrës së Kryeprokurorit të Shtetit, z. Agron Qalaj, ka mbajtur takimin e 287-të, ku anëtarët e KPK-së miratuan në tërësi rendin e paraparë të ditës dhe morën këto vendime, me ç’rast:

1. U informuan për pranimin e aktvendimit të Gjykatës Themelore në Prishtinë lidhur me procesin zgjedhor të kandidates nga radhët e prokurorive themelore;

2. Miratuan raportin e Komisionit Zgjedhor për anëtaren e KPK-së nga radhët e prokurorive themelore të vendit;

3. Certifikuan rezultatin përfundimtar të procesit zgjedhor për zgjedhjen e anëtares prokurore të Këshillit Prokurorial të Kosovës nga radhët e prokurorive themelore;

4. Pas certifikimit të rezultatit përfundimtar, anëtarja e zgjedhur nga radhët e prokurorive themelore, znj. Elza Bajrami-Kastrati, bëri betimin solemn para Këshillit, duke marrë zyrtarisht detyrën;

5. Miratuan Rregulloren për zgjedhjen e Kryesuesit dhe Zëvendëskryesuesit të Këshillit Prokurorial të Kosovës, me qëllim të rregullimit të procedurave dhe garantimit të një procesi transparent dhe të drejtë zgjedhor brenda Këshillit;

6. Shpallën thirrjen publike për paraqitjen e nominimeve për pozitën e Kryesuesit dhe Zëvendëskryesuesit të Këshillit Prokurorial të Kosovës, e cila do të publikohet nga 9 marsi 2026 në faqen zyrtare të Këshillit;

7. Miratuan kërkesën për pezullimin e përkohshëm nga detyra të prokurorit të shtetit, z. Milot Krasniqi, anëtar i Këshillit nga Prokuroria Speciale e Republikës së Kosovës, si dhe kërkesën e prokurores së shtetit nga Prokuroria Themelore në Prishtinë, znj. Elza Bajrami, anëtare e sapozgjedhur e Këshillit, të cilët do të vazhdojnë angazhimin e tyre në kuadër të KPK-së.