Në moshën 78 vjeçare ndërroi jetë afaristi i njohur gjilanas Rifat Sylejmani
Gjilan – Njëri ndër afaristët më të vjetër të qytetit të Gjilanit, Rifat Sylejmani, ka ndërruar jetë në moshën 78 vjeçare.
Lajmin për vdekjen e afaristit të njohur gjilanas, e ka publikuar djali i të ndjerit Rifat Sylejmani, Fatoni, përmes rrjeteve sociale.
“Me pikëllim të thellë njoftojmë të gjithë familjarët, miqtë dhe dashamirët se sot në moshën 78 vjeçare ndërroj jetë babai im Rifat Ilmi Sylejmani (Llashtica)”, ka shkruar ai.
Rifat Sylejmani njëherit ishte pronar i kompanisë ‘Nota Brillant’, i cili me punën e tij ka pushtuar tregun Kosovar e më gjerë.
Përveç një afarist jashtëzakonisht i suksesshëm, ishte personalitet i veçantë, i dashur e tejet i hapur në raporte me bashkëvendës, ndërsa shquhej me një lloj humori të lehtë, të cilin jo rrallë e ndërlidhte me ilustrime të sukseseve biznesore, duke i dhënë plotëkuptimësi tregimeve spontane të ndejave në cafe “Skay” e gjetiu.
Veçohej poashtu edhe me mbamendje të kthjelltë e të jashtëzakonshme, përkundër moshës që kishte pas të 60-ve. Dallohej edhe me një shije të hollë veshjeje moderne, me stil e sens të kohës, krahas jetës dhe moshës që e jetonte, veëmas pas periudhës së të 60-ve.
Rifat Sylejmani padyshim do të mbetet gjatë në kujtesën kolektive për një mori arsyesh, e posaçërisht për sensin e hollë prej biznesmeni të madh e të nderuar.
Varrimi i të ndjerit do të bëhet të hënën me Ikindi në varrezat e qytetit në Gjilan.
