Ndahet nga jeta mësuesi Burhandin Fehmi Salihu, 83-vjeçar
Në moshën 83-vjeçare ka ndërruar jetë mësuesi Burhandin Fehmi Salihu nga Gjilani, figurë e njohur e arsimit në Anamoravë.
Varrimi i të ndjerit do të bëhet të hënën, më 27 prill 2026, në varrezat e qytetit në Gjilan, në orën 13:00.
I lindur më 12 mars 1944 në Përlepnicë, Salihu shkollën fillore e nisi në Preshevë dhe e përfundoi në Tërnovc të Madh. Shkollën e mesme e kreu në Gjimnazin e Gjilanit, ndërsa studimet në Shkollën e Lartë Pedagogjike në Prishtinë. Në vitin 1967 përfundoi me sukses kursin për mësimdhënës klasor në Prizren.
Karrierën si mësues e nisi në shkollën e Makreshit të Ulët. Nga shtatori i vitit 1968 deri më 13 mars 2009, kur u pensionua, punoi si mësimdhënës i ciklit klasor në Shkollën Fillore “Musa Zajmi” në Gjilan.
Kolegët dhe nxënësit e kujtojnë si mësues të dashur, të vendosur dhe me parime. “Fjalëpak por besnik ndaj fjalës së dhënë,” thuhet për të.
Salihu vinte nga një familje me traditë atdhetare. Gjyshi i tij, Halim Aga, u masakrua në luftën e Gjilanit në vitin 1944. Babai, Fehmi Salihu, ishte gjithashtu mësues dhe i burgosur politik, ashtu si edhe vëllai Fatmir Salihu.
Për mbi 40 vite mbajti ditarin në dorë, duke edukuar breza tërë. Edhe gjatë luftës së viteve 1998/99, shtëpia e tij në Gjilan u dogj nga forcat serbe. Familja Salihu u përball me përndjekje për më shumë se 56 vite.
Ai la pas vetes dy vajza dhe dy djem. Djali i tij, Venhar Salihu, është kryetar i Gjykatës Themelore në Gjilan. Traditën e mësimdhënies në familje po e vazhdon edhe vajza e tij.
“Lapsi dhe ditari ishin arma e tij. Kurrë nuk tha jam i lodhur, as i trembur nga okupatori,” kujtojnë të afërmit.
