Murati: ‘Për shkak të LDK-së qytetarët po e paguajnë më shtrenjtë vajin dhe bukën’
Ministër i Financave, Punës dhe Transfereve, Hekuran Murati ka thënë se çmimet e importit për vaj dhe grurë kanë rënë.
Murati shton se qytetarët po vazhdojnë të paguajnë më shtrenjtë për shkak se Lidhja Demokratike e Kosovës (LDK) e ka dërguar Ligjin për Çmimet Tavan në Gjykatë Kushtetuese.
“Çmimi i furnizimit nga importi për vaj ushqimor ka rënë në 1.05 euro/litër. Çmimi i furnizimit nga importi për grurë ka rënë në 0.24 euro/kg”, ka shkruar Murati në Facebook.
“Ligjin për çmimet tavan, LDK e dërgoi në Gjykatë Kushtetuese. Prandaj, qytetarët vazhdojnë të paguajnë më shtrenjtë se që do duhej për vaj, miell e bukë”, shton ai.
LDK-ja si dhe partitë e tjera opozitare kishin thënë se ai Ligj për Çmimet Tavan bie në kundërshtim me Kushtetutën e Kosovës.
